DILI, 24 setembru 2021 (TATOLI)—Laureadu Prémiu Nobel da Paz, José Ramos Horta, hateten programa agrikultura ho sosiál tenke hala’o ho konsiénsia no integridade.
“Ba ha’u hahán ka ema ne’e kestaun morál étika. Iha mundu ne’e labele iha hamlaha tanba mundu riku tebes kompara ho tinan 50 liubá. Ema hamlaha barak maibé ne’e tempu uluk maibé agora kada Governu iha nia responsabilidade labele tane liman no hein komunidade de’it. Kria investimentu boot liu-liu iha agrikultura, responsabilidade boot ba iha agrikultura no programa sosiál tenke hala’o sira-nia knaar ho konsiénsia ho integridade,” José Ramos Horta hateten ba jornalista sira, bainhira partisipa iha konferénsia internasionál FIX the FOOD, iha kampaun UN, Caicoli, Dili, sesta ne’e.
Timor-leste tenke tau prioridade ba agrikultura, bee-moos, saúde, edukasaun, tanba ne’e kada nasaun mak iha konsiénsia labele krítika komunidade internasionál mak la apoiu, maibé failansu barak iha mundu ne’e tanba líder nasionál sira.
Reprezentante Programa Alimentar Mundiál (WFP-sigla inglês) iha Timor-Leste, Dangeng Liu, hateten ohin WFP hala’o konferénsia iha Oslo, Norwegia hodi konvida Laureadu Prémiu Nobel da paz sira atu fahe sira-nia hanoin kona-bá papel seguransa ai-han hodi kontribui ba dame no estabilidade.
“WFP Timor-Lesete kontente no orgullu tanba durante ne’e kontribui ona ai-han ba maluk sira-ne’ebé mak persiza tebes ajuda. Buat ne’ebé WFP kontribui ona mak hanesan fó ajuda hahan ba ema kbiit laek sira-ne’ebé persiza ai-han, program merenda eskolár no seluk tan,” Dagen Liu dehan.
Jornalista : Osória Marques
Editór : Cancio Ximenes
