DILI, 27 setembru 2021 (TATOLI)–Prezidente Repúblika, Francisco Guterres ‘Lú Olo’, segunda ne’e haruka pedidu ba Parlamentu Nasionál, nune’e aban (tersa, 28/09) reprezentante povu sira diskute no aprova estensaun estadu emerjénsia ba dala-XVIII.
Notísia Relevante: Governu propoin Prezidente Repúblika dekreta EE ba dala-XVIII
Pedidu ne’e haruka ba reprezentante povu sira hafoin Xefe Estadu rona opiniaun liuhosi reuniaun Konsellu Estadu (KS) no Konsellu Superiór Defeza no Seguransa (KSDS).
Asesór Polítiku Prezidente Repúblika, Gregório de Sousa, hateten só ho estadu emerjénsia mak bele limite direitu no liberdade sidadaun sira-nian tanba iha semana kotuk Governu haruka karta ba Prezidente Repúblika ho objetivu estende estadu emrjénsia.
“Ohin, Konsellu Estadu, Konsellu Superiór Defeza no Seguransa halo reuniaun no deside ho unanimidade atu Prezidente Repúblika husu ba Parlamentu Nasionál atu renova estadu emrjénsia ba dala-XVIII. Ohin mós, Prezidente Repúblika sei haruka pedidu ba Parlamentu Nasionál atu parlamentu ajenda ba aban dadeer tuku 09h00, hodi halo diskusaun kona-bá estende estadu emerjénsia ne’e ka lae,” Asesór Polítiku Prezidente Repúblika, Gregório de Sousa, informa ba jornalista sira, hafoin reuniaun KE-KSDS, iha Palásiu Prezidensiál Nicolau Lobato, Bairru-Pité, Dili.
Pedidiu Xefe Estadu nian ba Parlamentu Nasionál ne’e bazea ba proposta Governu nian no bazea mós ba propagasaun surtu COVID-19.
Entretantu, Prezidente Parlamentu Nasionál, Deputadu Aniceto Longuinhos Guterres Lopes, fó-sai liuhosi plenária segunda ne’e katak, aban sei halo diskusaun ba estensaun estadu emerjénsia ba dala-VIII.
Atualizasaun dadus hosi Sala Situasaun iha Sentru Integradu Jestaun Krize (CIGC, sigla portugés) fó-sai iha loron 26 setembru, horisehik katak kazu konfirmadu hamutuk 19.382, kazu konfirmadu foun 32, kazu baixa hela 994, rekuperadu 18.275 no óbitu ema na’in 113.
Nune’e mós, kazu mundiál nian hamutuk 219.456.675 no ema na’in 4.547.782 mate ona. Purtantu totál kazu iha Indonézia hamutuk 4.206.253, kazu foun 2.137 no ema na’in 141.381 mate ona iha territóriu Indonézia nian.
Jornalista : Evaristo Soares Martins
Editór : Cancio Ximenes
