BOBONARO, 27 setembru 2021 (TATOLI)—Jogu futeból femenina époka 2021, iha kampu futeból Maliana, munisípiu Bobonaro, ekipa Cavalo Fronteira manan Rokon FC ho rezultadu 10:0.
Iha inísiu jogu, ekipa rua koko forsa ho ida-idak nia tékniku, liu de’it minutu balun Cavalo halo kedan ameasa ba guarda rede Rokon FC liu hosi sutu livre, maibé bola kona de’it guardiaun.
Notísia relevante:Asosiasaun Futeból Bobonaro hahú jogu sub-22
Jogu kontinua to’o minutu tolu, akontese bola falta iha área Rokon no tenke iha penalidade, maibé oportunidade osan me’an ne’e jogadora (19) la konsege ezekuta ho susesu tanba bola ba los de’it guarda rede nia liman.
Liu de’it minutu ida, defeza Rokon FC halo tan fallansu, hodi rezulta penalidade iha minutu haat, ikus-mai jogadora Rofina Viegas (13), konsege ezekuta ho susesu hodi muda rezultadu ba 1:0.
Rezultadu ne’e halo situasaun kampu manas liu tan, Cavalo Fronteira hasa’e tan ritmu jogu meia kampu, halo ataka iha liña, hodi fó presaun tutuir malu, konsege hetan tan oportunudade liu hosi jogadora Ferdiana Gomes, fura tan golu ida iha minutu 15, iha ne’ebé liu de’it minutu ha’at jogadora avansada Rofina Viegas (13) fura tan Golu ida hodi dudu rezultadu ba 3:0.
Ekipa Cavalo Fronteira esforsu ho espiritu desportivu atu produs golu, ikus-mai iha minutu 21 jogadora Aurélia de Jesus (9) fura tán golu ida, liu de’it minutu ha’at avansada Rofina Viegas prodús tan golu iha minutu 33 hodi dudu rezultadu ba 5:0, rezultadu ne’e mantein to’o arbritu deside hakotu jogu primeira parte.
Tam aba segunda parte, Cavalo Froteira nafatin ho modelu jogu ofensivu no hasa’e tan ritmu hodi fó presaun liu hosi jogadora Aurélia de Jesus (9), halo defeza adversáriu atrapalla ho nia tékniku individuál, maibé la konsege prodús golu tanba defeza Rokon FC metin, ikus-mai jogadora Rofina Viegas (13) ataka makás liu tan iha liña oin, no pasa fali ba nia kolega Meliana Neves (7) prodús tan golu ida iha minutu 53 hodi muda rezultadu ba 6:0.
Liu de’it minutu hitu, jogadora Aurélia de Jesus (9) prodús tan golu ida hodi muda skore ba 7:0, ne’ebé halo jogadora ne’e konsege Marka Headtrick.
Rezultadu ne’e, halo adeptus Cavalo Fronteira haklalak hodi motiva liu tan ekipa atu prodús golu no oportunidade mai tan liu hosi jogadora Ferdiana Gomes (19), hodi prodús nafatin golu rua tutuir-malu hodi muda rezultadu ba 9:0.
To’o minutu 78, jogadora avansada Rofina Viegas (13) fura golu bad ala ikus liu hosi sutu livre, hodi aumenta tan rezultadu ba 10:0, jogu termina.
Treinadór Cavalo Fronteira, Jonas Caero Lopez, kontenti ho rezultadu vitória ne’ebé nia ekipa hatudu.
“Rezultadu festa golu ida-ne’e senti kontente, tanba durante ne’e ami iha preparasaun másima, maibé ida-ne’e jogu foin hahú. Ba oin ha’u haka’as tán atu lori sira treinu fízika, disiplina no badinas nune’e bele mantein vitória iha jogu tuir maia,” nia promete.
Treinadór Rokon FC, Mateus da Cruz, rekoñese nia ekipa derrota ho skore bot tanba preparasaun ladún másima.
Jogu ne’e lidera hosi arbitru lokál, Peregrino dos Reis, asistente primeiru, Longuinhos Correia, asistente segundu João Gouveia no Ofisiál arbitru, Marcel dos Santos.
Tuir oráriu hosi Asosiasaun Futeból Bobonaro, tersa 28 setembru, ekipa Faomahon sei kontra Solugolu Central FC, iha tuku 16:00 iha kampu futeból Maliana.
Jornalista: Sérgio da Cruz
Editór: Cipriano Colo
