BOBONARO, 27 setembru 2021 (TATOLI)—Konfrontu ne’ebé akontese iha área aldeia Daitete, suku Ritabou, postu administrativu Maliana, munisípiu Bobonaro, iha domingu (25/09), rezulta Nicodemos Gonsalves (27), lakon-vida, joven AP kanek todan, inklui uma ida hetan estragu.
Kronolojia hosi akontesimentu ne’e, iha domingu (25/09) iha serimónia kulturál ida ka festa uma-lisan ida ne’ebé iha mós divertimentu to’o tuku 3:00 madrugada, mosu provokasaun hosi joven balun, to’o ataka-malu iha nakukun laran, haksesuk-malu dook hosi festa kuaze metru 100, ikus-mai suspeitu-sira lori kanuru suru rai-henek nian ta’a vítima iha ulun.
Notísia relevante:Grupu balun kontinua asalta-malu iha Ritabou
Liu tiha oras balun maka komunidade haree vítima latan hela iha nakukun laran, no mai fó-hatene ba festa-na’in, hodi transporta kedan ba Ospitál Referál Maliana (HRM sígla portugés), atu halo tratamentu intensivu, maibé la konsege salva, tanba pankada makás iha Baboton halo ran sai barak.
Komandante Polísia Nasionál Timor-Leste (PNTL) munisípiu Bobonaro, Superintendente Antoninho Mauluta, hateten suspeitu hirak-ne’ebé involve iha kazu omesídiu ne’e, sei iha relasaun família ho vítima.
Polísia detein ona suspeitu na’in-tolu, no prosesu iha ona parte investigasaun nia liman, ne’ebé tempu badak sei aprezenta ba Ministériu Públiku.
“Mate-isin transporta ona ba Dili, hodi submete ba prosesu autopsia, nu’ene bele kompleta rezultadu investigasaun atu bele fasilita Komandu PNTL Bobonaro, ba rejista kazu ne’e iha MP. Suspeitu na’in-tolu Polísia asegura hela iha sela detensaun polísia Bobonaro, hodi hein rezultadu autopsia,” Superintendente Antoninho Mauluta hateten ba Jornalista-sira, iha Komandu munisípiu Bobonaro, segunda ne’e.
Tuir relatóriu hosi PNTL Bobonaro katak, situasaun jerál iha área aldeia Daitete la’o hakmatek, tanba polísia kontinua halo vizilánsia.
Matebian Nicodemos Gonsalves, hela iha Ma’hui, suku Ritabou, postu administrativu Maliana no joven ida ne’ebé kanek ho inisiál PA (21), mai hosi postu administrativu Atabae.
Jornalista: Sérgio da Cruz
Editór: Cipriano Colo
