DILI, 28 setembru 2021 (TATOLI)—Jogu jornada 11 Prá Liga Futsal Timor–Leste, ne’ebé hala’o iha kampu futsál FALINTIL-Forsa Defeza Timor–Leste (F-FDTL), Fatuhada entre Est Baguia FC ho Baucau All Star, ho rezultadu fahe pontu ba malu tanba empata 4-4, iha tersa ne’e.
Kualidade jogu ba ekipa rua ho forsa ne’ebé hanesan inklui iha parte téknika no oportunidade, durante jogu.
Notísia relevante:Pra Liga Futsal, Jerman manan “mihis” Boavista
Ritmu jogu hosi ekipa rua, laiha mudansa, maski iha minutu tolu dahuluk Est Baguia liu hosi nia jogadór Carlos Coelho oferese ona golu dahuluk, hodi hatur skore ba 1-0.
Hosi golu ne’e, provoka mós adversáriu to’o iha minutu lima, jogadór Baucau All Star responde kedan liu hosi produsaun golu liu hosi jogadór Guido da Silva, hodi muda rezultadu 1-1.
Maski ambiente kalan rai ladún manas, maibé jogu ne’e manas liu tán hodi to’o iha minute hitu, jogadór Est Baguia FC Lourenço Xinenes, marka golu ida hodi lori skore 2-1.
Hosi rezultadu ne’e, ekipa rua kontinua mantein ritmu no pozisaun jogu, maibé forsa ba Est Baguia FC sei makás liu, nune’e iha minutu 15, jogadór Lourenço Ximenes dere tan golu ida hodi muda rezultadu sai 3-1.
Árbitru hú árbitu hodi termina jogu primeira parte, ba oras deskansa nian no komesa hikas iha jogu segunda parte ho iis foun.
Durante jogu segunda parte hahú hosi minute dahuluk to’o minute 22 laiha produsaun golu ruma, maibé hakat to’o iha minutu 23, jogadór Est Baguia FC, Ivan Araújo marka golu ida hodi muda rezultadu sai dook liu tan 4-1.
Ho rezultadu ne’e, Baucau All Star kontinua ho kalma no hadi’a diak liu tan ritmu jogu iha área téknika, akompaña ho esforsu, to’o minutu 35 no 36 jogadór Guido da Silva responde golu rua tutuir-malu, hodi muda derrepente rezultadu ba 4-3.
Oportunidade di’ak seluk mosu mai duni ba Baucau All Star, hodi termina sira nia destinu iha minute 34 liu hosi jogadór, Eldino de Almeida, ne’ebé lansa golu ikus hodi nakfilak rezultadu sai 4-4.
Hosi golu ne’e mak hanesan golu ikus liu ba ekipa rua to’o minutu ikus ne’ebé ekipa rua obrigadu tenke fahe pontu hanesan ba malu 1-1.
Jornalista: Hrotencio Sanchez
Editór: Cipriano Colo
