DILI, 28 setembru 2021 (TATOLI)–Parlamentu Nasionál autoriza ona Prezidente Repúblika dekreta estadu emerjénsia ba dala-XVIII ona, tanba ne’e deputadu sira husu Governu hasa’e volume kobertura vasinasaun iha territóriu nasionál nune’e Timor-Leste bele fila ba normalidade.
Notísia Relevante: PM otimista konkretiza objetivu vasina 80% to’o tinan ne’e ramata
Aplikasaun deklarasaun estadu emerjénsia aplika dezde marsu 2020 no iha loron tersa (28 setembru 2021) ne’e Parlamentu Nasionál autoriza Preziente Repúblika dekreta Estadu Emerjénsia ba dala-XVIII ona.
Reprezentante Bankada Partidu Demokrátiku (PD), Deputada Elvina Sousa de Carvalho, hateten atu Timor-Leste fila hikas ba normalidade, entaun governu tenke hasa’e volume kobertura programa vasinasaun.
“Iha estensaun estadu emerjénsia ne’e hakarak hameno ba Governu hodi aselera no masimiza kobertura vasinasaun iha territóriu nasionál, nune’e ita fila-hikas ba normalidade,” Deputada Bankada Partidu Demokrátiku ne’e levanta liuhosi estensaun estadu emerjénsia bada la-XVIII, iha uma fukun, tersa ne’e.
Bankada PD husu Governu atu intensifika sosializasaun COVID-19 no intensifika sosializasaun vasina ne’e rasik iha territóriu nasionál, no rekomenda ba Governu respeita nafatin direitu umanu hosi sidadaun sira durante períodu estadu emerjénsia.
“Husu nafatin ba Governu atu labele ignora moras sira seluk hanesan dengue, kankru, Tuberkuloze (TBC) nomós moras sira seluk ne’ebé perigozu ne’ebé bele halakon ema-nia vida,” nia rekomenda.
Xefe Bankada Frente-Mudança (FM), Deputadu Isabel Maria Freitas Ximenes, apresia ho povu Timor-Leste ne’ebé kumpre ona medida serka sanitária no konfiamentu obrigatóriu durante ne’e no apresia ekipa liña frente sira.
“Ami mós fó apresiasaun aas ba ekipa liña frente sira, espesialmente hakarak fó ami-nia valorizasaun ba medida, enfermeiru no ekipa saúde vijilánsia sira, maibé presiza hasa’e tán kobertura vasinasaun,” Xefe Bankada Frente-Mudança ne’e fó hanoin.
Xefe Bankada União Democrátika Timorense (UDT), Deputadu Francisco David Xavier Carlos, husu mós ba Governu hasa’e programa vasinasaun iha territóriu nasionál.
“Sé la’ós ita, sé tan atu buka solusaun hodi fó esperansa ba povu nia moris iha situasaun saida de’it mak ita hasoru,” nia dehan.
Notísia Relevante: PN autoriza Prezidente Repúblika dekreta estadu emerjénsia ba dala-XVIII
Jornalista : Evaristo Soares Martins
Editór : Cancio Ximenes
