DILI, 28 setembru 2021 (TATOLI)—Atu hasa’e joven sira-nia kuñesimentu iha mekánika no manutensaun ba karreta no motor sira, Sentru Formasaun Mekánika Manutensaun Movel (M3), daudaun ne’e fó formasaun mekánika kona–bá hadi’a karreta no motor.
“Ami–nia formasaun ne’e ho objetivu, hakarak tulun ita–nia joven sira-ne’ebé mak remata ona estudu maibé sira la halo buat ida. Ho ida-ne’e, M3 ne’e mosu, hodi fasilita ita–nia joven sira ba área mekánika nian, nune’e sira bele kompete iha merkadória,” Diretór Sentru Formasaun Mekánika Manutensaun Movel (M3), Abilio Barreto de Jesus, hateten ba Agência Tatoli, iha nia knaar–fatin, Balide, Dili, tersa ne’e.
Iha formasaun área mekánika, nia dehan, bainhira mekánika sira-ne’ebé mak hetan hotu tiha formasaun mak sentru ne’e sei haree melhor kualidade, no bainhira atendimentu iha públiku, formandu sira-ne’e mós bele partisipa.
“Sira sei aprende teória. Hafoin teoria, sira tama ona ba prátika, Depois prátika hotu ona, sira tama kedas ba faze estájiu nian no estájiu hotu ami haree di’ak, ami uza sira iha ami–nia fatin,” nia esplika.
Matéria ne’ebé fó ba iha área mekánika mak oinsa sira bele dulas volante, oinsá sira bele muda mudansa, oinsá sama trabaun, no oinsá sira bele hatene baku sinál luminoza (lampu sen) ba loos no ba karuk.
“Daudaun ne’e formandu hamutuk na’in–10 mak tuir hela formasaun ba iha área ne’e, no ami–nia formasaun ne’e foin hahú iha segunda ne’e,” nia informa.
Sentru ne’e harii iha 2021, ne’ebé funda hosi ema na’in 12 mesak mekánika. Sentru ne’e hakarak ajuda Governu liuhosi área edukasaun formal hodi fó formasaun ba foinsa’e sira-ne’ebé mak dauudaun ne’e ramata ona estudu.
Área formasaun ne’ebé eziste iha sentru ne’e hanesan driver, mekánika kona–bá kareta no motor. Hosi área ne’e totál formandu ne’ebé daudaun tuir formasaun hamutuk na’in–10 ho formadór hamutuk na’in–12.
Entretantu, ba formandu sira ne’ebé tuir formasaun mekánika kona–bá kareta no motor liu-liu kona-bá driver ne’e rejistu $5.00, sertifikadu $5.00, no osan kada fulan ne’e selu $25, ho durasaun formasaun hanesan teória fulan ida, prátika fulan ida no estájiu fulan rua ho gratuita.
Jornalista : Nelia Fernandes
Editór : Cancio Ximenes
