DILI, 29 setembru 2021 (TATOLI)-Governu liuhosi Sekretaria Estadu Igualdade no Inkluzaun (SEII), hamutuk ho Grupu Feto Parlamentár Timor-Leste (GMPTL-sigla portugés) no mos parseiru sira realiza symposiu nasionál ho tema “Futuru Prezidente ba ita hotu” liliu hametin partisipasaun feto iha eleisaun prezidensiál 2022.
Prezidente Grupu Feto Parlamentár Timor-Leste (GMPTL-sigla portugés), Lídia Norberta dos Santos hateten symposiu nasionál ne’e hanesan programa kontinuasaun husi worshop nasionál ne’ebé antes ne’e hala’o ona iha loron 27 fulan-setembru kona-ba hametin partisipasaun feto iha prosesu eleisaun prezidensiál no eleisaun parlamentár.
GMPTL nu’udar mahon ba feto sira iha Parlamentu Nasionál tanba ne’e, persiza asegura nafatin partisipasaun feto-sira iha vida polítika hodi kontribui ba prosesu dezenvolvimentu.
Iha biban hanesan Country Diretora Plan Internsionál iha Timor-Leste, Diliana Ximenes, hateten symposiu nasionál ne’e hodi fahe esperénsia ba malu kona-ba eleisaun prezidensiál ne’ebé sei akontese iha tinan 2021 liliu involvimentu feto atu asume kargu importante sira hahú kedas husi Prezidente Repúblika to’o autoridade lokál.
“Iha Symposiu ne’e mós ita ko’alia kona-ba oinsá partisipasaun lideransa feto atu bele lidera nasaun iha futuru, maibé atu sai lideransa ne’e la’os de’it ba Prezidente Repúblika maibé oinsá sai mós lideransa ba nivél hotu-hotu hahú hosi nasionál to’o baze,” nia dehan.
Aleinde ne’e, Prezidente Komisaun Nasionál Eleisaun (CNE–sigla portugés)), José Agostinho da Costa Belo, ne’ebé sai oradór ba symposiu nasionál hateten CNE no STAE preparadu atu organiza eleisaun rua ne’e ho susesu.
“Ha’u mai fó hanoin oinsá atu asegura eleisaun Prezidensiál no Parlamentár ne’ebé sei hala’o iha tinan oin mai ne’ebé ohin ita hato’o hela kona-ba atividade sira ne’ebé daudaun ne’e la’o hela, asegura oinsá iha preparasaun ba eleisaun ne’e tenke prepara ho di’ak nune’e durante eleisaun la’o ho di’ak,” nia dehan.
Jornalista : Arminda Fonseca
Editór : Agapito dos Santos
