DILI, 29 setembru 2021 (TATOLI)—Hahú hosi tinan 2003 to’o fulan juñu 2021, Komisaun Nasionál Kombate HIV-SIDA Timor-Leste, rejista ema ho moras HIV-SIDA hamutuk 1.374, no hosi númeru ne’e iha na’in 155 mak mate, na’in 656 mak hala’o tratamentu intensivu no restu seidauk hala’o tratamentu tanba hela iha área rurál no dook hosi fasilidade saúde.
“Sira ne’ebé sofre moras ne’e maioria idade joven, hahú hosi 14 to’o 50,” Sekretáriu Ezekutivu, Komisuan Nasionál no Kombate HIV-SIDA, Atanásio de Jesus, hateten durante sensibilizasaun ba dosente no estudante iha Universidade da Paz (UNPAZ), kuarta ne’e.
Notísia relevante:Viqueque rejista kazu HIV-SIDA 12, na’in-rua mate
Organizasaun barak mak serbisu hamutuk ho Minsitériu Saúde (MS), hanesan Estrela+ no Esperansa, hodi hala’o tratamentu no halo akompañamentu ba pasiente na’in 565.
Iha fatin hanesan, Prezidente Komisaun F Parlamentu Nasionál (PN), Noé da Silva, konsidera sensibilizasaun ne’e importante atu estudante-sira bele prevene an.
Partisipa iha programa sensibilizasaun ne’e, estudante hosi UNPAZ, Institutu Siénsia Saúde (ICS sígla portugés) no Universidade Timor Orientál (UNITAL).
Jornalista: Felicidade Ximenes
Editór: Cipriano Colo
