DILI, 29 setembru 2021 (TATOLI)—Sekretária Estadu Protesaun Sivíl (SEPS), sei rekruta membru Bombeiru na’in 96, hodi koloka ba munisípiu Manatuto, Ermera no Liquiça, iha tempu badak.
“Ita prevee iha Orsamentu Jerál Estadu 2021, hodi halo rekrutamentu ba membru Bombeiru, no ita heina hela autorizasaun hosi Ministru Interiór (MI),” Diretór Jerál SEPS, Ismael da Costa Babo, hateten ba jornalista iha Otel JL Villa, Fatuhada, kuarta ne’e.
Notísia relevante:Feto 26 servisu iha Korpu Bombeiru
Bainhira iha ona autorizasaun hosi MI, SEPS sei koordena ho Komisaun Funsaun Públiku (CFP, sígla portugés) atu bele loke ba públiku.
Antes ne’e SEPS rekruta ona membru Bombeiru 60-resin ne’ebé kolokadu ba Ainaro ho munisípiu sira seluk tan.
Diresaun Nasionál Bombeiru, tutela iha SEPS ho nia misaun fó garantia ba prestasaun nó seguransa ba sidadaun hotu-hotu nia-vida ho sira-nia sasan hamate ahi ne’ebé han-uma, ai-laran ka florestano indústria.
Alende ne’e, fó assisténsia ba asidente rodoviáriu no halo mós salvamentu iha área rurál, sidade laran, inklui fó-apoiu ba komunidade ne’ebé hasoru dezastre naturál.
Jornalista: Nelson de Sousa
Editór: Cipriano Colo
