DILI, 29 setembru 2021 (TATOLI)-Governu Tailándia liuhosi ninia reprezentante iha Timor-Leste, kuarta ne’e entrega osan hamutuk $2.900 ba Fundasaun Alola hodi promove ekonomia feto sira-nian liuhosi produtu artezenatu.
Embaixadór Tailándia, Ekapol Poolpipat hateten apoia ne’e hodi diversifika ekonomia feto sira-nian liliu produsaun tais timor hodi faan iha merkadu.
Dezde tinan 2014 liubá, Fundasaun Alola estabelese ona kooperasaun servisu ho Governu Tailándia oinsá atu reforsa ekonomia feto.
“Ita hatene iha Fundasaun Alola sira promove kultura liuhusi produtu artezenatu sira, entaun apoiu ne’e mós sei ajuda Alola fó treinamentu arte ba maluk feto sira,” Embaixadór Ekapol Poolpipat ba jornalista-sira iha Embaixada Tailándia Faról, Dili.
Iha fatin hanesan Diretór Interinu Fundasaun Alola, José Ximenes hateten Governu Tailándia nafatin iha kompromisu atu kontinua oferese apoiu ba Fundasaun Alola hodi tau matan ba inan sira ne’ebé konsidera laiha kbiit no marzinalizada hodi sustenta sira-nia familia.
“Apoiu ida ne’e ba inan kbiit-laek no faluk sira ne’ebé marzinalizada sira, ne’ebé mak la asesu ba oportunidade hotu-hotu liuliu la asesu ba informasaun merkadu, sira ne’e mak ami fó prioridade fundu sira ne’e la’ós atu fó ba ema ida-idak maibé oinsá fó ba grupu mak liuhosi kapasitasaun hasa’e sira-nia ablilidade, tanba liuhosi abilidade ne’e sira oinsá sira bele hadi’a sira-nia ekonómia família nian,” José ximenes hateten.
Atu diversifika ekonomia feto sira-nian, durante tinan barak ona Fundasaun Alola kapasita feto sira liuhosi formasaun negósiu, produsaun mina nuu virjen, no seluk tan.
Ho produtu hirak ne’e maka kada tinan organizasaun naun govermental ne’e organiza feira iha loron boot natal no paskua hodi faan sira-nia produtu artezenatu.
“Ami konvida sira mai partisipa iha feira hodi faan sira-nia produtu nune’e ema sosa, bainhira feira ramata ita sukat grupu sira bele hetan rendimentu menus liu $500 sa’e liu $ 2.000 osan sira ne’e sira lori ba sira-nia uma hodi sustenta uma-laran. Baibain feira ami halo ne’e tinan ida dala rua, ne’ebé tinan ida grupu sira bele hetan osan $ 20.000 to’o $ 30.000 hosi fundu kiik ida ne’e,” nia dehan.
Ba futuru, nia esplika Fundasaun Alola planea ona sei prepara fatin ba feto sira hodi faan sira-nia produtu ne’ebé prodúz ona iha merkadu nune’e bele diversifika ekonomia família.
Jornalista: Arminda Fonseca
Editór : Agapito dos Santos
