DILI, 30 setembru 2021 (TATOLI)—Becusse United FC susesu halakon Boa Sorte FC ho rezultadu 6-3 iha jogu kontinuasaun jornada 12 Prá Liga Futsal Timor–Leste, ne’ebé hala’o iha kampu futsal FALINTIL-Forsa Defeza Timor–Leste Fatuhada Dili, kinta ne’e.
Iha inísiu jogu, Becusse United FC hatudu kedan karáter emosionál, nune’e iha minutu sia jogadór Venceslau Guterres, lansa uluk primeiru golu hodi hatur rezultadu ba 1-0.
Notísia relevante:Santa Cruz FC halakon Gamer FC 5-1
Boa Sorte FC la nonok, maibé mós halo reasaun makás ho kontra atake hasoru adversáriu ne’e, maibé la konsege fó rezultadu.
Nune’e, iha minutu 21 jogadór Becusse United FC, Venceslau Guterres, nafatin produs tan golu ida hodi lori rezultadu ba 2-0.
Jogu manas liu tán, jogadór Nazário dos Santos, iha minutu 24 hetan tan oportunidade, hodi marka tan golu ida ba rede Boa Sorte FC lori rezultadu ba 3-0.
Ho emosionál tebes ekipa Boa Sorte FC muda tékniku jogu, nune’e bele hatama netik golu ruma, no iha duni rezultadu tanba minutu 24 jogadór Joel Liafer, fura duni rede Becusse United FC ne’ebé antes ne’e metin tebes hodi muda rezultadu ba 3-1.
Maibé iha minutu 31 no 35, jogadór Venceslau Guterres responde kedan golu rua tutuir-malu hodi hadook tan rezultadu ba 5-1 halo Boa Sorte FC tenke serbisu makas liu tan iha kampou laran.
Hakak ba minutu 30, Ronelio Xavier hosi Boa Sorte FC responde tan golu ida hodi lori rezultadu ba 5-2, maibé Venceslau Guterres iha minutu 38 lansa nafatin golu hodi hametin rezultadu ba 6-2, maibé jogadór Boa Sorte FC Salvador Saldanha, responde kedan golu ida ne’e iha minute 39 hodi nakfilak skore ba 6-3.
Hosi rezultadu ne’e mak metin ona iha ne’e, to’o jogu termina laiha tan golu ruma mak akontese ba ekipa rua no Vitoria hela ba Becusse United FC.
Jornalista: Hortencio Sanchez
Editór: Cipriano Colo
