BOBONARO, 30 setembru 2021 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, husu Unidade Patrullamentu Fronteira (UPF) atu hametin unidade no hatudu serbisu ho maduru nakonu ho responsabilidade, tuir lema ne’ebé hateten ‘Hau nia sakrifisiu mak ha’u nia dedikasaun ba Estadu’.
Komisáriu Faustino da Costa husu ne’e iha ámbitu selebera aniversáriu ezisténsia UPF ba dala XVII (18), kinta ne’e, iha kuartél UPF Batugade.
Notísia relevante:Limitasaun ekipamentu no distánsia difikulta UPF asegura fronteira
“Kompara ho ema moris ida karik, idade ida ne’ebé konsideradu adultu ona. Nune’e, membru sira tenke hatudu disiplina no responsabilidade iha kna’ar fatin,” Komisáriu Faustino da Costa, hateten.
PNTL hanesan instituisaun Estadu ne’ebé hatur iha lei seguransa nasionál, tantu orgánika polísia nian, nune’e tenke disiplina tenke bainhira de’it no iha ne’ebé de’it.
Membru-sira mós tenke disiplina no respeita irarkia komandu hanesan polísia ida ne’ebé ho karáter prosimidade ka polisia komunitária, maski ninia estatutuáriu no formasaun idéntiku ho militár, maibé la’ós militár.
Husu membru sira bainhira halo atuasaun ba povu, tenke tuir lei haruka, tanba prezensa UPF iha liña fronteira, hanesan autoridade ida ne’ebé atu asegura hodi garante hakmatek no seguru ba komunidade.
Nia mós louva no apresia serbisu UPF, maski durante ezisténsia membru sempre hasoru difikuldade, kona-bá kondisaun infraestrutura, ekipamentu no rekursu umanu, maibé nafatin firme hakur dezafiu no obstákulu sira ne’e hodi halo kna’ar tuir lei atribui.
Serbisu boot ne’ebé UPF presija halo maka, halo preparasaun ba eleisaun Prezidensiál tuir kalendáriu hosi órgaun eleitorál, katak sei akontese iha 2022, nune’e membru PNTL tomak tenki prepara an no prontu asegura atividade politíka hosi polítiku sira, hahú hosi kampaña to’o anunsiu rezultadu.
Ikus liu agradese ba parte hotu, liu-liu parseiru-sira hanesan sosiedade sivil, parseiru dezenvolvimentu sira ne’ebé apoia UPF, kria kondisaun balun hodi hala’o kna’ar durante tinan 18.
Iha loron 30 fulan setembru Timor-Leste estabelese UPF, iha instituisaun PNTL hodi halao misaun seguransa iha liña fronteira entre Timor-leste ho Indonezia, hahu hosi Oe-cuse, Bobonaro to’o Covalima.
UPF halo nia misaun bazeia ba prosedimentu espesializada tuir dekretu lei numeru 9/2009 loron 18 fevreiru kona-bá lei orgánika PNTL artigu 33.
Funsaun atu halo patrullamentu iha fronteira teritoriál sira no iha koordenasaun ho kooperasaun interesada-sira seluk, espesialmente F-FDTL, kontrola ema no sasan iha fronteira teritorial ho koordenasaun serbisu entre Alfandega no imigrasaun, koopera ho autoridade administrativa relevante sira seluk, tuir lejislasaun fiskál aduaneiru no sanitária.
Ezisténsia UPF iha liña fronteira, atu halo kontrolu hodi hapara tráfiku umanu, tráfiku kilat ilegál no krimi organizadu sira no prevene movimentasaun ilegál, hodi asegura soberania Timor-Leste.
Jornalista: Sérgio da Cruz
Editór: Cipriano Colo
