DILI, 01 outubru 2021 (TATOLI) – Iha jogu primeira parte no segunda parte entre ekipa Est. Baguia FC ho BTAL FC, iha kampu futsal FALINTIL-Forsa Defeza Timor – Leste (F-FDTL) Fatuhada Dili, sesta kalan, iha Jogu kontinuasaun Pra Liga Timor – Leste ba jornada 12, ekipa BTAL FC tenke sofre golu haat husi Est. Baguia FC.
Golu haat ne’e bainhira halo komparasaun, Est Baguia FC ultrapasa de’it ho golu rua tanba durante jogu, primeira parte maske Est. Baguia FC prodús golu haat maibé BTAL FC mós konsege hatama golu rua ba ekipa Est. Baguia FC nia guarda-rede, 4-2.
Iha jogu ne’e, ekipa idaidak, dezde primeiru minutu hahú halo kontra no atake ba malu tuir tékniku idaidak nian iha kampu laran, hodi bele termina jogu ho vitória. Guarda-rede Est. Baguia FC ho BTAL FC nunka hetan fura ba malu tanba maske jogadór husi ekipa adversária rua iha tentativa atu hatama golu maibé la kona alvu no kada ameasa ne’ebé mak iha sempre salva.
Ekipa rua la rende ba malu. Maske nune’e, iha minutu ualu, sutu Baguia nian kona duni iha alvu liuhosi jogadór Lourenço Ximenes hodi hatur eskoru ba 1-0, nune’e iha minutu 15 jogadór BTAL Natalino Salsinha responde kedan golu ida hotu halo rezultadu nakfilak ba 1-1.
Jogu komesa manas liután, nune’e jogadór parte rua nafatin fó ameasa ba malu. Nune’e iha minutu 21, Osvaldo do Rego oferese tan golu ida ba Baguia hodi halo eskoru 2-1. La’ós ne’e de’it iha minutu 32, jogadór ne’e fura tan rede BTAL hodi halo rezultadu ba 3-1.
Haree ba jogu manas liután, halo ekipa rua liuliu BTAL tenke serbisu maka’as iha kampu laran nune’e bele halo empata jogu ne’e maibé esforsu hirak ne’e hela de’it hanesan esforsu tanba iha minute 34, Jordão da Silva hosi Baguia lansa tan golu ikus hodi hatur rezultadu ba 4-1.
BTAL la lakon esperansa nafatin hatudu jogu ho dignidade maski lakon ona. Maibé teki-teki iha minutu 38, jogadór BTAL Natalino Salsinha lansa tan golu ida hodi muda eskoru ba 4-2. Depois golu rua ne’e, mezmu BTAL luta atu alkansa no ultrapasa golu Est. Baguia FC maibé la fasil. Nune’e rezultadu ikus 4-2 no vitória monsu ba Est. Baguia FC.
Jornalista: Hortencio Sanchez
Editór: Rafy Belo
