DILI, 04 outubru 2021 (TATOLI)-Membru Falintil-Forsa Defeza Timor-Leste (F-FDTL) hamutuk na’in 30 termina ona formasaun kona-ba seguransa protesaun autoridade.
“Menbru sira ne’e tuir ona kursu espesilizasaun hodi apriende prosedimentu hanesan kondutór no seguransa pesoál, fizíku no seluktan ho nia papél atu fó seguransa ba komandante unidade no bainhira Governu presiza prontu fó seguransa ba autoridade sivíl no bainaka internasionál,” Xefe Estadu Maiór F-FDTL, Brigadeiru Jenerál,Calisto dos Santos ‘Coliati’, hateten ba jornalista iha ámbitu ensaramentu kursu refere iha edifísiu Unidade Polísia Militár, Mascarinhas, segunda ne’e.
Nia husu membru sira atu implementa fali matéria ne’ebé durante hetan ba iha serbisu ho profisionál.
Coliati apresia ho instrutór Polísia Militár ne’ebé fó ona formasaun ba formandu sira no komandu hanoin ba oin sei kontinua formasaun hanesan.
Nune’e mós, Diretór Kursu Formasaun Seguransa Autoridade hosi Polísia Militár (PM), Kapitaun,Francisco dos Reis Neto, hateten, kursu seguransa protesaun autoridade tinan ne’e dá-la uluk ne’ebé unidade PM hala’o bazea despasu Xefe Estadu Maiór Jenerál nian, hala’o durante semana rua; hahú iha 20 setembru to’o 01 outubru ho durasaun oras 80.
Ho finalidade hosi kursu ida ne’e fó espesializa ba militár sira-nia atividade nu’udar seguransa hodi patroniza ka uniformiza seguransa autoridade ninian.
Instrutór formasaun mai hosi Polísia Militár rasik ho asesór Polísia Militár Brazil.
Durante semana rua matéria ba formasaun maka hanesan organizasaun servisu seguransa autoridade, diresaun defensiva no tátika, armamentu tiru, ezersísiu prátika, medida administrativa, treinamentu fíziku militár, atentadu no seluktan.
Enkuantu, membru sira ne’ebé partisipa iha formasaun ne’e mai hosi Komponente Navál, kuartel Jenerál, Sentru Formasaun Treinu Metinaro, Komponente Terrestre, Komponente Apoiu Servisu no Unidade Falintil ne’ebé ho postu primeiru sarjentu, kabu no soldadu.
Iha serimónia ensaramentu kursu Polísia Unidade Militár entrega mós sertifikadu ba formandu sira.
Jornalista:Nelson de Sousa
Editór: Rafy Belo
