DILI, 06 outubru 2021 (TATOLI)-Responsavel Orfanatu Dominikana Rozáriu Bidau Mota-Klaran Dili, Irman Flavia Mendonça, relata kuaze tinan 2 ona nia parte la asesu bee moos ne’ebé maka daudaun ne’e forñese husi Diresaun Bee Timor-Leste.
“Difikuldade ida ne’e la’os foin maibé dezde tinan rua ona maske ami iha mákina dada bee (sániu), maibé bee foer ami uza ladi’ak entaun kada semana ami tenke sosa bee-moos,” Irman Flavia Mendonça, lamenta ba Agência Tatoli iha ninia servisu fatin Bidau.
Notísia Relevante :Fundasaun Quesadhip Ruak apoiu aihan ba Orfanatu Dominikana
Nia dehan to’o agora ninia parte seidauk relata problema ne’e ba Ministériu Obra Públika (MOP) no Bee Timor-Leste. Enkuantu antes ne’e informa ona UNICEF iha Timor-Leste.
“Ami husu ba Governu karik bele ajuda ami ho bee-moos tanba iha ne’e ami ho labarik sira, ne’ebé bainhihra bee laiha ami senti araska loos, tanba agora mós tempu bailaron,” nia hateten.
Entretantu, Tatoli tenta konfirma informasaun ne’e ho Sekretariadu Prezidente Autoridade Munisípiu Dili,maibé seidauk bele fó resposta.
Jornalista : Arminda Fonseca
Editór : Agapito dos Santos
