DILI, 07 outubru 2021 (TATOLI) – Ekipa Jerman FC mantein iha nia pozisaun hodi hamriik firme hanesan ekipa ne’ebé forte hodi la fó pontu fraku ba nia adversáriu Baucau All Star durante minutu 40 iha kampu laran bainhira joga, iha jogu kontinuasaun Pra Liga Futsal Timor–Leste ne’ebé hala’o iha kampu Futsal FALINTIL-Forsa Defeza Timor – Leste (F-FDTL) Fatuhada Dili, kinta kalan.
Ho pozisaun ne’ebé iha, fó duni rezultadu di’ak ba Jerman ho susesu halakon Baucau ho eskore 8-2.
Golu ne’ebé Jerman rekolla bainhira jogu oferese mós hosi jogadór ne’ebé foin mak transfere ba Bernabe Soares ne’ebé antes ne’e joga iha Santa Cruz FC. Ho prezensa Bernabe halo jogu moris tebes iha kampu laran kompara ho jogu sira liu ona ba kotuk. Bernabe lori ritmu foun. Bernabe hamosu eufória foun. Durante iha kampu kuadradu nia laran, Bernabe nia kosar-been la nabeen saugati de’it. Nia oferese golu tolu hodi sai “hatrick”.
Jogu minutu 20 primeiru hahú, seidauk iha adeptu ne’ebé harame kampo hanesan baibain, tanba ne’e ekipa rua halao kontra ho atake ba malu, hatudu tékniku no abilidade tuir ida-idak nia ekipa ho kalma.
Maibé Jerman hala’o jogu ne’ebé moris bainhira hetan prezensa Bernabe nian, ho nune’e iha minutu tolu Bernabe konsege fura ona rede Baucau hodi hatuur rezultadu ba 1-0.
Jogu sai manas liután ba ekipa rua, jogadór sira duir bola hosi ain ba ain iha kampo laran. Pintas malu ba mai hodi buka se loos mak atu hatama tan golu. Maibé sorte di’ak monu nafatin ba Jerman hosi Elidio Soares lansa golu ho bola velosidade maka’as ba guarda-rede Baucau ne’ebé guarda hosi Marcus la hetan salvasaun no rezulta duni golu nakfilak rezultadu ba 2-0.
Liu de’it minutu ida iha minutu 16, Rafael Carvalho hetan bola pasa ida ho kalma hosi nia amigu Elidio Soares, iha bola pasa ne’e livre loos ba Rafael ikus mai konsege halo duni golu hodi lori rezultadu ba 3-0. Golu ne’e mak hanesan golu ikus hodi hakotu minutu primeiru.
Iha minutu deskansa nian jogadór sira tenke sai ba li’ur minutu balun hodi hemu bee no dada iis hafoin tama fila fali ba kampu laran hodi luta ba minutu 20 ikus hodi buka se loos mak manan hodi hetan pontu tolu (3) hodi halo mudansa ba valór tabela klasifikasaun provizóriu.
Adeptu sira komesa hakbesik an halo nakonu kampu-ninin. Kampu-ninin enfeita ho ema. Maibé, la hakilar barullu hanesan baibain. Nune’e jogu ne’e la’o iha ámbitu hakmatek nia laran. Adeptu hakmatek. Kalan hakmatek.
Hakur hikas ba segunda parte, ekipa rua nafatin hatudu sira-nia abilidade jogu ho responsabilidade hodi hadau bola ba malu liu hosi ain ba ain ho kalma no la halo falta ba malu, la kria erru ba malu.
Bainhira to’o iha minutu 21 oportunidade monu tan ba ekipa Jerman liu hosi nia jogadór Agustinho Soares prodús tan golu ida lori kedan rezultadu ba 4-0.
Baucau nafatin serbisu maka’as maski rezultadu golu Jerman nian ba sira namlele dook los ona. Serbisu hirak ne’ebé Baucau halo la sai de’it hanesan serbisu lerek maibé hatudu duni prova; ikus mai iha minutu 25 jogadór Eldinho de Almeida lansa golu ida hodi muda rezultadu zero ne’e ba 4-1. Golu ne’ebé jogadór ne’e halo furak tebes bainhira nia suta ho ain karuk halo guarda-rede Jerman Afonso Soares labele salva. Satan la biban.
Jogadór Baucau enerjétiku liután. Nune’e, liu de’it minutu ida, Jogadór “Baucau gimata”, Filipe Boaventura iha minutu 26 lansa tan golu ida lori rezultadu ba 4-2.
Haree ba rezultadu komesa besik ona ba Jerman halo ekipa ne’e tenke serbisu liután, liki-kosar maka’as. Halai maka’as. Badinas hamate adversáriu nia jogu ikusmai rezulta duni golu iha minutu 29 liuhosi jogadór Hendrique da Costa hodi muda lalais rezultadu ba 5-2.
Jogu nafatin la’o. Iha adeptu Jerman nian, ida rua hakilar hodi fó apoiu ba Jerman maibé lian la maka’as. Maibé Jerman halo serbisu duni. Sira halo. Halo to’o nia finalidade rezulta valór di’ak ba sira-nia ekipa.
Haksoit ba minutu 36, Jogadór Rafael Carvalho utiliza oportunidade ho di’ak no kalma halo tan golu ida muda rezultadu ba 6-2.
Baucau laiha ona esperansa atu duni Jerman tanba laiha ona kapasidade jogu hasoru Jerman ne’ebé ho forsa tékniku maka’as ba bebeik. Iha oportunidade ne’e, halo jogadór Bernabe iha minutu rua tutuir malu ’38, ’39, lansa tan golu rua hodi hatur nia títulu “hatrick” no hametin rezultadu ba 8-2 to’o jogu termina laiha tan golu ruma. Vitória semo kedan ba Jerman nia liman ho pontu tolu. Enkuantu Baucau hela ho zero.
Jogu ne’e dirije hosi árbitru Euzebio Martins primeiru, segundu Timotio Rasi no rezerva José Leonito.
Jornalista: Hortencio Sanchez
Editór: Rafy Belo
