DILI, 11 outobru 2021 (TATOLI)— Sekretáriu Estadu Protesaun Sivíl (SEPS) liuhosi Diresaun Nasionál Prevensaun Konflitu Komunitária (DNPKK), hamutuk ho UN Women halo sensibilizasaun matadalan sensivel ba jéneru no feto ba pás ba estudante universitáriu-sira.
Diretór Diresaun Nasionál Prevensaun Konflitu Komunitáriu, António Viegas, hateten, sensibilizasaun sensivel ba jérenu no feto ba pás ba estudante Universidade Nasionál Timor-Leste (UNTL), Universidade Oriental Timor Lorosa’e (UNITAL), Universidade de Dili (UNDIL) no Universidade da Paz (UNPAZ) atu hakbiit koñesimentu hodi kontribui ba pás, estabilidade no prevene konflitu iha sosiedade.
“Ita nia estudante sira maka sai autór atu lori pás no estabilidade ba sosiedade nia leet. Nune’e Ami aprezenta matadalan sensivel ba jéneru no feto ba pás hodi konsensializa estudante kontribui ba pás no estabilidade iha sosiadade nia leet,” Diretór DNPKK ne’e hateten iha salaun ótel Luz Clarita-Acait, segunda ne’e.
Objetivu sensibilizasaun hakbiit koñesimentu estudante univeritáriu-sira hodi hamutuk ho ema hotu nia partisipasaun liuliu ema vunerável atu harii pás, estabilidade no prevene konflitu iha komunidade.
Iha biban hanesan, Analista Programa Feto Pás no Seguransa hosi Organizasaun UN Women, Leonizia Tekla da Silva, dehan, sensibilizasaun ne’e partisipa hosi estudante universitáriu haat, oinsá bele hatene saida maka sensivel ba jéneru no feto ba pás.
“Estudante sira halo sira nia papél hanesan akadémiku ne’ebé presiza hakbiit atu iha abilidade atu apoiu líder komunitáriu sira ba prevensaun rkonflitu iha komunidade,”Analista UN Women ne’e afirma
UN Women konsidera sensibilizasaun ba mediasaun sensivel jérenu di’ak ba estudante-sira atu aumenta partisipasaun ema hotu inklui feto sai mediadór ba prevensaun konflitu iha komunidade.
Tuir dadus, hahú hosi janeiru to’o agostu tinan ne’e, DNPKK rejista kazu foun hamutuk 295 hosi territóriu no kazu ne’ebé prosesa hela hosi 2020 to’o 2021 iha 134 ho arkivu ka rezolvidu liuhosi prosesu mediasaun hamutuk 196, ne’ebé ho autór no vitíma iha mane 452 no feto 132.
Kazu sira-ne’e, mediadór-sira simu hosi komunidade hodi fasilita de’it mediasaun to’o parte simu malu, hodi komprometidu sei la kria tan konflitu no pronto kontribui ba estabilidade iha sosiedade
Notísi Relevante: DNPKK kapasita treinadór 12 ba prevensaun konflitu
Jornalista: Natalino Costa
Editór : Florencio Miranda Ximenes
