VIQUEQUE, 12 outubru 2021 (TATOLI)—Relasiona ho loron mundiál redusaun risku dezastre naturál ne’ebé kada tinan sempre selebra iha loron 13 outubru, Catholic Relief Services (CRS) lansa kuadru alerta sedu iha fatin risku fenómenu erozaun vulkániku (Rai Sut), iha Raitahu, suku Uma Uain Kraik, postu administrativu Viqueque, munisípiu Viqueque.
“Inisiativa ne’e hodi komunidade bele hatene risku dezastre no bele hetan informasaun alerta hodi labele afeta ba komunidade nia vida,” Reprezentante CRS, Alberto dos Reis Freitas, informa ba Agência TATOLI, iha suku Uma Uain Kraik, tersa ne’e.
Tuir Alberto, dalaruma dezastre akontese iha fatin risku Rai Sut la tuir tempu, tanba ne’e bainhira laiha sistema alerta sedu, bele fó perigu ba ema-nia vida.
“Bainhira la tau sinál, sei iha impaktu ba ita-nia komunidade agrikultór ne’ebé halo to’os. Bainhira fenómenu naturál ne’e mosu, rai manas maka’as, nakfera derrepente, rai bubu sa’e 50cm to’o metru ida, no rona lian hanesan aviaun, akompaña ho ahi lakan sa’e,” nia akresenta.
Iha biban hanesan, Administradór munisípiu Viqueque, Januário Soares ‘Boly’, hateten, Rai Sut ne’e akontese beibeik no foin lalais akontese rai lakan maka’as tan iha tinan 2021.
Notísia relevante: IPG foti ona amostra fenómenu naturál iha Viqueque
“Ita seidauk rona vítima ba Rai Sut ida-ne’e, tanba ne’e espera bainhira tau kuadru ne’e, labele afeta ba ita-nia komunidade nia vida,” nia hatutan.
Autoridade munisipál husu ba komunidade atu tau atensaun ba fenómenu naturál, nune’e labele fó impaktu maka’as ba ema.
Reprezentante Xefe suku Uma Uain Kraik, João da Costa, agradese ba CRS ne’ebé tau ona kuadru iha fatin Rai Sut hodi komunidade bele hatene katak fatin ne’e risku no bele hamate ema-nia vida.
Seremónia ne’e partisipa hosi Care Internasionál, International Organization for Migration (OIM), Autoridade lokál no komunidade lokál.
Jornalista : Vitorino Lopes da Costa
Editora : Julia Chatarina
