Amu Locatelli husu mídia divulga problema ne’ebé povu Ossouala enfrenta
BAUCAU, 15 outubru 2021 (TATOLI)—Padre Elisio Locatelli husu ba midía sira atu divulga ka fó sai problema sosiál ne’ebé povu Ossouala enfrenta ba públiku, nune’e Governu bele fó atensaun.
Notísia Relevante: Responsável kaixa Alfa 7 fó sasin involvimentu luta rezisténsia ba AMRT
“Susar situasaun ne’ebé ita enfrenta iha Ossouola no ita husu mós iha selebrasaun ne’e mídia sira iha ne’e atu bele fó sai hodi bele Governu tau atensaun,’’ Padre Locatelli, SDB, hateten iha nia omília iha selebrasaun misa agradesimentu entrega dokumentu rezisténsia hosi kaixa klandestina sira iha Ossuala ba AMRT, iha kapela Ossouola, Vemasse, Baucau, sesta ne’e.
Padre Locatelli hateten, komunidade Ossouala sente ukun an seida’uk kompletu, tanba mezmu liberta an ona hosi kilat nia tarutu maibé ne’e primeiru pasu no pasu tuir mai atu liberta an hosi ki’ak seidauk.
Tanba, amululik ne’e hateten, besik tinan 20 ona TL hetan indepedénsia maibé povu Ossouala seidauk asesu eletrisidade, labarik sira atu ramata sira-nia ensinu báziku tenke husik sira-nia uma ba eskola dook, saúde iha duni maibé ida maibé susar simu aimoruk no fasilidade atu bele ba vizita komunidade ne’e estrada sai problema boot ida.
Nune’e, saserdote ne’e konsidera papél mídia importante atu fó sai situasaun konkreta ne’ebé komunidade hasoru atu bele ukun-na’in sira rona hodi tau atensaun.
Amu Locatelli husu sarani sira liuhosi selebrasaun misa ne’e atu reza no refleta uitoan kona-ba prosesu luta tinan 24 ho terus barak, no servisu ho domin ne’ebé boot to’o fó-an ba mate liu-liu iha Ossouala ne’ebé fó ona kontribuisaun boot iha tempu luta ba libertasaun nasionál.
“Maske buat ne’e hotu agora ita fó-an hanensan iha funu laran atu hetan liberdade hosi kilat sira, no agora ukun-na’in sira presiza hadi’a fó solusaun ba problema ne’ebé ita hasoru daudaun ne’e,” nia hateten.
Jornalista : Nelson de Sousa
Editór : Cancio Ximenes
