DILI, 15 outubru 2021 (TATOLI)— Komandante Jerál Polísia Nasionál Timor-Leste (PNTL), Komisáriu Faustino da Costa, informa, prevee ona orsamentu $70.000-resin atu halo instalasaun ba torre komunikasaun tolu fasilita membru-sira utuliza rádiu hodi komunika malu.
“Ita halo ona konkursu bainhira iha empreza vensedór, ita bele halo kontratu atu konstrui torre tolu. Hosi Orsamentu 2021 ho montante $70.000,” Komisáriu Faustino, hateten ba jornalista sira iha edífisiu PDHJ, Caicoli, sesta ne’e.
Daudaun, PNTL iha rádiu komunikasaun sufisiente, maibé labele uza tanba torre atu fornese rede laiha.
Aleinde ne’e, Komisáriu PNTL mós iha planu atu halo akizasaun ba rádiu komunikasaun hodi distribui ba membru iha munisípiu hotu.
“Ami hakarak halo minimu membru sira tenke iha rádiu hotu atu iha situasaun ruma fasil komunika malu hodi halo serbisu di’ak liután,” nia subliña
Jornalista: Natalino Costa
Editór: Florencio Miranda Ximenes
