Top

Administradór Don Aleixo hakotu-iis tanba sofre kardiovaskular

Matebian Administradór postu administrativu Don Aleixo, Munisípiu Dili, José de Sousa da Costa. Imajen/ Espesiál

DILI, 17 outubru 2021(TATOLI)- Administradór Postu Administrativu Don Aleixo, Munisípiu Dili, José de Sousa da Costa, Domingu (17/10), purvolta tuku 01:00, madrugada, hakotu iis iha Hospitál Nasionál Guido Valadares (HNGV) tanba sofre kardiovaskular.

“Ha’u sente triste tebes, tanba ha’u nian pai iha sesta ne’e, sei halo serbisu hanesan baibain no la moras ida. Horiseik, ha’u pai sei telefone ha’u ba hadi’a nian komputadór iha kantór.  Horikalan, ami sei konversa halimar to’o iha tuku 12:00, kalan. Derepente pai sente moras fuan, entaun ha’u tula ba HNGV no to’o iha ne’eba médiku-sira fó tratamentu, maibé to’o tuku 01:00, madrugada, ne’e. Ha’u nia pai hakotu iis,” Oan-mane bo’ot, Nivio de Sousa da Costa, hateten ho matan-been ba Agência TATOLI iha Surikmas-Dili.

Kona-ba prosesu funerál, nia dehan sei haloot matebian iha Dili, maibé parte familia sei tuur hamutuk atu deside tuir kultura ka tradisaun.

Iha biban hanesan, Xefe Suku Comoro, Eurico da Costa, sente triste tanba lakon ema di’ak ida, ne’ebé iha nia ukun lakohi ko’alia barak, maibé serbisu maka barak hodi fó atendimentu ba populasaun.

“Ha’u la fiar Administradòr Dom Aleixo mate ohin, tanba iha loron hira nia sei halo kordenasaun servisu ho ami Xefe Suku sira,” nia afirma.

Autoridade lokál iha Don Aleixo sente sente lakon líder di’ak tanba matebian foin simu pose iha setembru, maibé Maromak bolu hikas fali. 

Matebian José de Sousa da Costa moris iha Dili 4 jullu 1971. Molok ne’e nuudar Funsionáriu Ministériu Turizmu, Komérsiu no Industria (MTKI).

Iha fulan Setembru 2021 hetan fiar hosi Ministériu Administrasaun Estatál (MAE)  asume Administradór postu administrativu Don Aleixo, munisípiu Dili ba períodu tinan haat, hahú 2021 to’o tinan 2024.

Notísia Relevante: Administradór postu lima iha Dili simu tomada pose

Jornalista: Natalino Costa

Editór: Florencio Miranda Ximenes

Publisidade

Leave a Reply

Latest Post

error: Content is protected !!