OÉ-CUSSE, 18 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA) lideradu Arsénio Paixão Bano, apoia urjénsia uma-kain haat (4) iha sub rejiaun Oésilo tanba afeta hosi dezastre naturál.
Sekretaria Rejionál ba Asuntu Edukasaun no Solidáriedade Sosiál no Inkluzaun, liuhosi ekipa jestaun dezastre naturál hamutuk ho protesaun sivíl apoia urjénsia ba vítima dezastre naturál uma kain-haat iha bairru Kisan, suku Usitaqueno no bairru Nakome, suku Usitasa’e, sub rejiaun Oésilo.
Sekretária Rejionál ba Asuntu Edukasaun no Solidáriedade Sosiál no Inkluzaun, Avelina da Costa, esplika, akontesimentu udan no anin boot iha sesta semana kotuk, estraga uma haat, uma rua iha bairru Kisan, suku Usitaqueno no uma rua iha bairru Nakome, suku Usitasa’e.
“Estraga komunidade nia uma hamutuk haat, entaun ita simu pedidu hosi lideransa autoridade lokál sira atu husu apoia urjénsia, nune’e mak ita koordena no orienta parseiru sira hanesan Cruz Vermella Timor-Leste (CVTL) iha Oé-Cusse hamutuk parte protesaun sivíl no bombeiru, fornese apoiu food item no non food item ba vítima sira,” Avelina da Costa, informa ba Agencia TATOLI, iha Oé-Cusse, segunda ne’e
Nia esplika, apoiu food item no non item sira-ne’e kompostu hosi sasán dapur nian, hanesan foos, bikan, kanuru, supermiE, lona, no seluk-tán.
Apoia ne’e ho objetivu atu hakmaan família afeitadu sira hosi situasaun ne’e, nune’e bele rekupera nesesidade família nian tanba ekipa dezastre hosi autoridade identifika ona katak, iha uma haat ne’e, rua estraga totál no rua seluk estraga kmaan.
“Ne’e maka ita intervein ho urjensia, no tékniku sira identifika uma rua aat totál tau ona ba ajenda serbisu sosiál nian, atu halo konstrusaun foun ka halo reabilitasaun, depende hosi rezultadu identifikasaun, karik iha posibilidade bele halo konstrusaun ba sira,” nia tenik.
Entretantu, xefe suku Usitaqueno, Francisco Elo, agradese ba autoridade tanba apoia ninia komunidade sira iha situasaun dezastre naturál ne’e.
“Ami agradese ba autoridade, tanba hafoin submete ami-nia pedidu konsege halo intervensaun urjénsia, apoiu foos, mina goreng, lona, sanan, bikan, kanuru no sekuk, tán”, lidér komunitária ne’e agradese
Jornalista : Abílio Elo Nini
Editór : Evaristo Soares Martins
