DTT Baucau hatama reseita rihun $11-resin ba kofre estadu
BAUCAU, 19 outubru 2021 (TATOLI) – Diresaun Transporte no Terrestre (DTT) Munisípiu Baucau hatama reseita rihun $11.580 ba kofre estadu iha fulan-setembru nia laran.
Diretór DTT munisípiu Baucau, Roberto da Cruz, esplika reseita ne’e mai hosi ema-ne’ebé trata dokumentu rejistu hamutuk 108 ho orsamentu hamutuk rihun $1.350, lisensa transporte públiku hamutuk 67 ninia orsamentu rihun $2.540.
Enkuantu, ema ne’ebé trata karta kondusaun hamutuk na’in-133 totál orsamentu rihun $2.335 no inspesaun hamutuk ema 572, totál orsamentu rihun $ 5.355.
“Totál ema-ne’ebé mai trata dokumentu iha Diresaun Transporte Terrestre Munisípal Baucau iha fulan-setembru hamutuk 880 no ninia orsamentu ne’ebé hatama reseita estadu hamutuk rihun $ 11.580,” nia informa ba Agência TATOLI, iha Baucau, tersa ne’e.
Roberto hatutan, volume atendimentu hahú aumenta relasiona ho serka sanitária ne’ebé governu hakotu ona iha munisípiu Baucau.
Nia husu atu na’in ba motorizada no motorista atu aproveita renova fali dokumentu antes diresaun nasionál implementa fali multa ba dokumentu sira-ne’ebé liu ona prazu.
Entertantu, iha fulan-agostu DTT Baucau rekolla reseita hamutuk rihun $ 11.717.50, hosi totál ema-ne’ebé trata dokumentu hamutuk 899.
Jornalista : Natalino Belo
Editór : Evaristo Soares Martins
