DILI, 20 outubru 2021 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, kuarta ne’e informa funsionamentu Parlamentu Nasionál no proposta-lei Orsamentu Jerál Estadu (OJE) 2022 ba Prezidente Repúblika (PR), Francisco Guterres Lú-Olo.
Notísia Relevante: Proposta-lei OJE 2022 baixa ona ba KEP sira
“Durante sorumutu, ha’u informa kona-ba funsionamentu PN no proposta-lei Orsamentu Jerál Estadu (OJE) 2022 ho montante biliaun $1,675 ne’ebé iha loron 15 outubru ne’e, Governu submete ona ba Parlamentu Nasionál,” Aniceto Guterres hateten ba jornalista sira hafoin hala’o enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili.
Iha tersa (19/10) ne’e, liuhosi plenária baixa ona proposta-lei OJE 2022 ne’e ba Komisaun C (Finansa Públika) no Komisaun Espesializada Permanente (KEP) sira hodi halo analiza no pareser, no Komisaun C aprova ona kalendáriu debate proposta-lei OJE 2022 no iha kinta (21/10) sei aprezenta ba reuniaun lidér bankada hodi aprova.
PPN, Aniceto Guterres, hateten orsamentu Prezidente Repúblika sei fó hanoin ba Governu no orsamentu atu aprova ka lae ne’e, kompeténsia Parlamentu Nasionál nian no orsamentu ne’ebé ideal liu ne’e ohin ko’alia uitoan ho Prezidente Repúblika.
Aleinde ne’e, nia dehan, Prezidente Repúblika hanesan símbolu garante funsionamentu normál instituisaun demokrátika inklui Parlamentu Nasionál no maske orgaun soberania ketak-ketak maibé tenke informa ka relata funsionamentu Parlamentu Nasionál nian ba Xefe Estadu.
Notísia Relevante: Governu submete Proposta Lei OJE 2022 biliaun $1,675 ba PN
Jornalista : Nelson de Sousa
Editór : Cancio Ximenes
