DILI, 21 outubru 2021 (TATOLI)— Ministériu Saúde liuhosi Diresaun Jerál Koorporativu hahú prosesa dokumentu profisionál saúde iha liña frente atu submete ba Ministériu Finansa hodi prosesa pagamentu suplementu remuneratóriu.
“Iha fim outubru ne’e, ami hahú submete ba Ministériu Finansa atu prosesa pagamentu,” Diretór Jerál Serbisu Koorporativu, Ministeriu Saúde, Marcelo Amaral, hateten ba Agência TATOLI, bainhira partisipa iha internasionál semináriu on living Science, iha salaun UNITAL, Becora, kinta ne’e.
Notísia Relevante: MF halo pagamentu suplementu remuneratóriu ba liña frente Polísia Migrasaun
Tuir lista profisionál saúde ne’ebé maka tama kategoria liña frente no iha direitu atu hetan suplementu remuneratóriu hamutuk 8.000-resin.
Tuir dekretu lei, Profisionál Saúde ne’ebé halo atendimentu direta ba pasiente sira iha izolamentu no kuarentena maka loron ida hetan $25.
“Maibé Profisionál Saúde ne’ebé la fó atendimentu direta mós hakarak $25, ne’ebé ami husu ona ba parte jurídiku Ministériu nian atu verifika no fó pareser ,” nia afirma.
Pendente lista profisionál saúde ladauk vasina
Diretór Marcelo Amaral, informa, nia parte simu ona instrusaun hosi Ministra Saúde Odete Maria Freitas Belo, atu labele prosesa dokumentu profisionál Saúde ne’ebé seidauk simu vasina.
“Ami simu ona instrusaun hosi Ministra Saúde atu trava lista Pesoál Saúde ne’ebé iha kategoria liña frente, maibé seidauk simu vasina,” nia akresenta.
Tanba, Profisionál Saúde mak tenke hatudu exemplu di’ak ba populasaun atu prevene no luta hasoru COVID-19 liuhosi vasina.
”Ami identifika liña frente kuaje 100-resin la vasina entaun ami trava sira-nia pagamentu tanba sira obrigatóriu hanesan liña frente tenke vasina hodi hatudu ba ema katak sira seguru hodi halo tratamentu di’ak ba ita-nia komunidade sira,’’ Diretór Jerál ne’e afirma.
Entretantu, Ministériu Finansa (MF) liuhosi Sekretariadu Tékniku Fundu COVID-19, halo ona pagamentu ba pesoál liña frente hamutuk 449, hosi Sala Situasaun, Sentru Integradu Jestaun Krize (CIGC, sigla portugés), ho montante $322.925, ba períodu fulan-fevereiru to’o maiu 2021.
Nune’e mós, iha loron tersa (12/10), MF halo uluk pagamentu ba pesoál liña frente, Polísia Migrasaun hamutuk 143, ho montante $158.790, ba períodu fulan-marsu to’o juñu 2021.
Notísia Relevante: MF halo pagamentu suplementu remuneratóriu pesoál liña frente CIGC
Jornalista : Felicidade Ximenes
Editór : Florencio Miranda Ximenes
