DILI, 25 outubru 2021 (TATOLI)—Prezidente Interinu no Atuál Primeiru Vise-Prezidente Partidu Libertasaun Populár (PLP), Abrão Jose Freitas ‘Mate Restu’, hateten PLP laiha kandidatura ba Prezidente Repúblika hodi kompete iha eleisaun prezidensiál 2022.
Notísia Relevante: PR dekreta kalendáriu eleisaun, kandidatu bele aprezenta kandidatura ba TR
“PLP laiha kandidatura Prezidente Repúblika ruma atu kompete iha Eleisaun Prezidensiál 2022,” Abrão Jose Freitas hateten ba Agência Tatoli liuhosi telefónika, segunda ne’e.
Prezidente Interinu PLP ne’e hateten, provizóriu internalmente konsulta ona ho Prezidente Partidu atuál hanesan Primeiru-Ministru ne’ebé iha ona aseitasaun ida ba eleisaun prezidensiál, PLP sei laiha kandidatura atu kompete tanba sei haree konsentrasaun iha oitavu Governu Konstitusionál.
Atu apoiu figura sé hodi kompete iha eleisaun prezidensiál, nia dehan, daudaun ne’e PLP seida’uk iha komunikasaun polítika no seidauk hatene kandidatu ne’e sé-sé.
“Internalmente ami seidauk iha komunikasaun ruma ba ida-ne’e,” nia dehan.
Iha tinan ne’e, PLP nia konsentrasaun foku ba iha atividade konsolidasaun hametin estrutra no reajustamentu estrutura hosi nasionál to’o baze, hodi halo preparasaun ba eleisaun parlamentár iha 2023.
Nune’e mós, PLP sei prepara konferénsia partidu nian ba orgaun asosiadu sira no tinan oin sei hakat ba konferénsia munisípiu, no tuir mai tama kongresu nasionál.
“Tanba, durante ne’e situasaun COVID-19 labele hala’o atividade sira, nune’e agora reforsa atividade sira iha baze hodi halo preparasaun ba eleisaun parlamentár ne’ebé mai,” nia hateten.
Notísia Relevante: STAE-CNE lansa resensiamentu eleitorál ba preparasaun eleisaun prezidensiál 2022
Jornalista : Nelson de Sousa
Editór : Cancio Ximenes
