LIQUIÇA, 28 outubru 2021 (TATOLI)— Ekipa Selesaun Nasionál U23 Timor-Leste prontu ona iha fíziku no tékniku atu kontra ekipa Korea Súl, iha jogu kualifikasaun AFC U23 ASIAN CUP 2022, iha estádiu Venue Jalan Besar Singapura, kinta (28/10), tuku 18:00,kalan ne’e.
Iha kualifikasaun AFC CUP U23 2022, Selesaun Nasionál Timor-Leste junta iha grupu H, kompostu hosi selesaun nasionál U23 hosi nasaun Korea Súl, Filipina no Singapura (empate 2-2 ho Timor-Leste).
Notísia Relevante: Kualifikasaun AFC CUP, Timor-Leste empate ho Singapura 2-2
“Ita nia ekipa prontu ona iha fíziku no tékniku atu kontra Korea Súl. Tanba iha jogu dahuluk kontra Singapura ho jogadór na’in 10 to’o minutu 69, ne’ebé halo jogadór-sira tenke serbisu makas durante jogu, maibe rekuperadu ona sira fiziku durante deskansa loron-rua,” Treinadór Prinsipál Selesaun Nasional U23 Timor-Leste, Fabio Joaquim Maciel da Silva, informa ba Agência TATOLI, via rede sosiál, kinta ne’e.
Ekipa Korea Súl sai ekipa forte iha grupu H, maibé ekipa Lafaek la duvida atu kontra tanba ekipa Korea Súl iha frakeza balun iha liña oin.
Istória mós hatudu ona ba Timor-Leste, iha 21 jullu 2017 iha Estádiu Chin Minh, Korea ba “Kualifikasaun piala Ázia” ho rezultadu empate 0-0.
“Ita tenta atu aproveita frakeza kiik-oan hirak ne’e atu fó vantajen ba ita iha jogu,loron ohin nian,” nia espera.
Jogadór Paulo Gally hetan kartaun mean iha jogu entre ekipa Timor-Leste U23 hasoru Singapura, bainhira selebra golu.
“Ita nia jogadór Gally sei la partisipa joga hasoru Korea Súl, maibé la fó ameasa ba ekipa Timor-Leste tanba ita nia preparasaun dezde tinan kotuk kedan ne’ebé jogadór sira di’ak hotu,” nia subliña.
Iha Jogu dahuluk, Ekipa Lafaek liuhosi Jogadór Paulo Gally (21) ne’ebé halai iha liña oin konsege marka golu rua hodi halo empate 2-2 hasoru nia adversáriu Singapura hanesan uma-na’in ba jogu kualifikasaun AFC U23 ASIAN CUP 2022.
Notísia Relevante: AFC CUP U23: Timor-Leste kontra Korea Súl iha 28 outubru
Jornalista : Hortencio Sanchez
Editór : Florencio Miranda Ximenes
