Top

Governu kompromete hamatan ba Centro Audiovisuál Max Stahl Timor-Leste

Primeiru-Ministru, Taur Matan Ruak. Imajen Tatoli/Egas Cristovão

DILI, 28 outubru 2021 (TATOLI)—Primeiru-Ministru (PM), Taur Matan Ruak, hateten Governu haree hela atu kontinua tau matan ba Centro Audiovisuál Max Stahl Timor-Leste (CAMTL, siglá portugés).

Notísia Relevante: Governu Timor-Leste hato’o sentidu lutu ba falesimentu éroi Max Stahl

“Governu agora haree hela tempu badak atu tau matan ba timor-oan sira-ne’ebé servisu iha Centro Audiovisuál Max Stahl Timor-Leste no dokumentu istóriku sira-ne’ebé hanesan osan-mean, ne’ebé prezerva iha sentru audioviosual ne’e,” Primeiru-Ministru, Tauur Matan Ruak, hateten ba jornalista sira hafoin ramata sorumutu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.

Iha sorumutu ne’e, Xefe Governu mós hato’o kestaun ne’e ba Prezidente Repúblika, tanba éroi Max Stahl hakotu ona iis iha kinta (28/10), iha tuku 04h33, iha Brisbane-Austrália, nune’e oinsa Governu kontinua tau matan ba prezervasaun istória sira iha luta libertasaun hasoru okupasaun ilegál Indonézia ne’ebé prezerva hela iha sentru ne’e.

Tanba antes ne’e, atu prezerva istória luta timoroan sira-nian, Max Stahl harii no jere rasik sentru arkivu audiovizual ho nia naran, Centro Audiovisual Max Stahl, ne’ebé rejista akontesimentu istóriku ne’ebé nia halibur durante tinan-25 nia laran. No arkivu sira-ne’ebé iha sentru ne’e, hetan mós rekoñesimentu hosi Organizasaun Nasaun Unida ba Edukasaun, Siénsia no Kultura, UNESCO (sigla-inglés) hanesan “Rejistu ba Mundu nia Memória”.

Durante ne’e, ba nesesidade edukasaun no investigasaun, Centro Audiovisuál Max Stahl mós servisu hamutuk ho Universidade de Coimbra, Portugal, hodi arkiva-online dokumentu istóriku sira-ne’ebé sentru ne’e prezerva.

Vídeo Masakre Santa Cruz, 12 Novembru 1991, ne’ebé jornalista Max Stahl filma ne’e, ninia video orijinál rejistu tiha ona iha memória UNESCO nian, katak rekoñesimentu hosi mundu tomak iha ona.

UNESCO hanesan organizasaun ONU ne’ebé haree kona-ba patrimóniu kulturál no Timor-Leste presiza mós atu prezerva vídeo orijinál ne’ebé oras ne’e sai hanesan propriedade intelektuál Max Stahl nian, ne’ebé atu entrega ka la entrega ba Estadu, ne’e direitu tomak hosi Max Stahl nian.

Notísia Relevante: Ramos Horta: Max Stahl sempre iha Povu Timor-Leste nia fuan

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!