DILI, 29 outubru 2021 (TATOLI)— Komandante Jerál Polísia Nasionál Timor-Leste (PNTL), Komisáriu Faustino da Costa, lori institusaun PNTL nia naran hato’o sentidu lutu ba falesimentu Primeiru Sarjentu Júlia Moniz ne’ebé hakotu iis iha, kinta (28/10), tuku 03:15, madrugada, iha Sentru izolamentu Lahane.
“Manifesta sentidu kondolénsia tanba matebian Primeira Sarjentu Júlia Moniz fila ona ba aman Maromak nia kadunan Santo no fó korajen ba família bele akompaña situasaun ho seridade kalma no forsa,” refere nota ne’ebé Agência TATOLI asesu, sesta ne’e.
Iha biban seluk, Vise Ministru Interiór, Antonio Armindo, lori funsionáriu tomak iha Ministériu Interiór ho nia funsionáriu hato’o mós sentidu kondolénsia ba falesimentu Primeiru Sarjentu Júlia Moniz.
“Hato’o profudu kondolénsia ba familia bo’ot Polísia Nasionál Timor-Leste bainhira rona nia ema di’ak ida, Primeira Sarjentu Julia Moniz, fila hikas ba ona ba aman Maromak nia kadunan santo,” nota ne’e akresta.
Matebian Primeiru Sarjentu Júlia Moniz, durante moris asume mós kargu iha Relasaun Públika Komandu Polísia Nasionál Timor-Leste hodi koopera ho instituisaun mídia atu kobre no públika atividade PNTL nian.
Tuir planu, sesta (29/10), tuku 15:00, família matebian ho Polísia Nasionál Timor-Leste hala’o haloot mate-isin Júlia Moniz iha semitériu Becussi.
Jornalista : Natalino Costa
Editór : Florencio Miranda Ximenes
