DILI, 04 outubru 2021 (TATOLI)—Ministériu Asuntu Parlamentár no Komunikasaun Sosiál (MAPKOMS), lideradu Francisco Martins da Costa Jerónimo, propoin $9,066,076 iha Orsamentu Jerál Estadu (OJE) 2022 hodi finansia programa rua no sub-programa haat ho atividade 20.
Notísia Relevante: MAPKOMS prevee millaun $9 iha OJE 2021
“Iha 2022, ami-nia orsamentu hamutuk millaun $9-resin hodi prevee ba atividade lubuk hanesan harii torre, kontratu funsionáriu, atividade naroman ba suku no apoiu rádiu komunidade sira,” Ministru Francisco Martins da Costa Jerónimo hateten ba Agência Tatoli hafoin ramata audénsia públika ho Komisaun A Parlamentu Nasionál iha Parlamentu Nasionál, kinta ne’e.
Iha audiénsia ne’e, MAPKOMS mós relata progressu ezekusaun OJE 2021 nian ne’ebé to’o iha 31 outubru atinji ona 73% no previzaun to’o iha dezembru bele ezekuta ramata ho 90%, tanba barak liu verba transferénsia, hein transfere no bens servisu no ba atividade iha suku seluk tán.
Papél Ministéiru ba Asuntu Parlamentár no Komunikasaun Sosiál (MAPKOMS) nu’udar departamentu governamentál responsável ba kosensaun, ezekusaun, koordenasaun no avalia polítika, define no aprova hosi Konsellu Ministru ba área komunisaun sosiál no asuntu parlamentár (Artigo 16º do Decreto-Lei N.º 20/2020 de 28 de maio, primeira alteração ao Decreto-Lei N.o 14/2018, de 17 de agosto, sobre a Orgânica do VIII Governo Constitucional).
Tuir dokumentu livru 2 planu anuual OJE 2022 MAPKOMS prevee $9,066,076 aloka ba saláriu vensimnetu $942,052, bens Servius $3,498,425, kapitál menór $115,777, kapitál dezenvolvimentu $ 2,000,000 no transferénsia $2,509,822, hodi finansia programa rua, sub-programa haat no atividade 20.
MAPKOMS nia programa prioridade mak hanesan iha programa ho kódiku 439, garante liberdade espresaun no asesu informasaun sei gasta 6,349,644 no programa ho kódiku 510, boa-governasaun no jestaun instituisionál sei gasta $2,716,432.
Programa garante liberdade espresaun no asesu informasaun, ho objetivu médiu prazu (outcome) aumenta númeru populasaun ezerse no espresa sira-nia opiniaun ba Governu kona-ba asuntu governasaun, dezenvolvimentu no asuntu importante seluk.
Ninia sub-programa, diseminasaun informasaun kona-ba asaun governativa no pograma dezenvolvimentu ho nia atividade peskiza index públiku asesu meiu komunikasaun sosiál, fortalese servisu komunikasaun sosiál no informasaun Governu, disemina infomrasaun programa Governu no dezenvolvimentu ba públiku iha niveél nasionál, munisipál no komunitária, nune’e mós atividade Governu no meiu komunidade (Governu iha provu nia leet (Naroman ba Suku).
Aleinde sub-programa, MAPKOMS enkoraza diversifikasaun meiu komunikasaun sosiál ho nia atividade fortalesimentu rádiu komunidade, atividade promosaun no konsolidasaun papél RTTL, propor polítika no elabora lejislasaun iha área komunikasaun sosiál.
Nune’e mós atividade promove diversifikasaun meiu komunikasaun sosiál iha nivél munisipál, formasaun téknika iha komunikasaun, reforsa servisu Agência Noticiosa TATOLI, IP, atividade konstrusaun torre RTTL iha lokál 12 (Naunil, Codo, munisípiu Lautém, Monte Perdidu-Viqueque, Bobonaro-Ainaro, Lalimlau-Ermera, Tapo Tas-Maliana, Oé-Cusse, Manatuto, Manufahi, Balibo-Maliana no Covalima), no fortalese relasaun ho organizasaun mídia no grupu komunitáriu (apoia mídia privadou).
Enkuantu programa boa-governasaun no jestaun instituisionál ho objetivu médiu prazu (outcome) konstrui konfinasa Governu. Ninia sub-programa boa-governasaun ho atividade planeamentu, dezenvolvimentu estratéjiku no orientasaun polítika, inspesaun fiskalizasaun no auditoria, koordenasaun asuntu parlamentár.
Sub-programa jestaun instituisionál ho nia atividade jestaun finanseira administrasaun no lojístika, planeamentu monitorizasaun no estatístika, jestaun rekursu umanu, formasaun no kapasitasaun rekursu umanu, aprovizionamentu no jestaun kontratu,
MAPKOMS aprezenta ba 2022 ho estimativa forsa funsionáriu 255 (feto 97 no mane 158) no funsionáriu 29 ho kargu dirasaun no xefia.
Jornalista : Nelson de Sousa
Editór : Cancio Ximenes
