DILI, 11 novembru 2021 (TATOLI)– Prezidente Komite Reguladora Arte Marsiál (KRAM),Octaviano da Conceição, husu ba joven-sira ne’ebé envolve iha organizasaun arte-marsiál atu inspira éroi 12 novembru hodi hametin unidade nasionál.
“Ha’u husu ba joven hotu ne’ebé envolve an iha arte marsiál tenke mantein unidade nasionál, atu haburas ita nia demokrásia nuudar mehi ba joven hotu-hotu iha tempu liuba ne’ebé fó an ba mate,” Prezidente KRAM ne’e, hateten ba Agência TATOLI, iha edifisiu KRAM-Lecidere, kinta ne’e.
Notísia Relevante: Loron 12 novembru nu’udar reflesaun ba foin-sa’e iha era independénsia
KRAM husu ba organizasaun arte marsiál no organizasaun rezisténsia hotu atu asegura pás no estabilidade hodi kontribui ba prosesu dezenvolvimentu iha Timor-Leste.
Nuudar mós sobrivivente, nia relembra éroi masakre 12 novembru sira la haree ba kór, polítika, rasa, relijiaun no suku, maibé hamutuk hodi luta ba ukun rasik an.
“Ita ohin loron ukun an ona, ita tenke hametin unidade nasionál hodi luta hamutuk lori dezenvolvimentu ba povu,” nia enkoraja.
Governu liuhosi Sekretáriu Estadu Juventude no Desportu estabele KRAM ho dekretu-lei númeru 5/2017 hodi atu regula, kontrola no fiskaliza arte-marsiál
“Ita hakarak re-integra organizasaun arte-marsiál sira ba sosiedade hodi enkuadra ba modalidade desportu,” nia afirma.
KRAM nia kbi’it atu regula de’it arte-marsiál sira ho lei ne’ebé iha, maibé kona-ba krime ne’ebé joven-sira halo ne’e kompétensia Polisia Nasional Timor-Leste (PNTL) halo atuasaun no prosesa tuir lei.
Notísia Relevante: SEJD husu foin-sa’e timoroan tenke valoriza éroi 12 Novembru
Jornalista : Hortencio Sanchez
Editór : Florencio Miranda Ximenes
