BAUCAU, 18 novembru 2021 (TATOLI) – Servisu Saúde Munisípiu Baucau apela ba komunidade sira atu prevene-aan hosi moras dengue durante períodu udan monu-rai.
Diretór Servisu Saúde Munisípiu Baucau, Domingos Reinaldo da Costa Guterres, esplika, saúde munisipál nafatin kontinua sensibiliza informasaun ba komunidade sira liuhosi responsável programa sira kona-ba sosializasaun no prevenesaun programa dengue iha komunidade.
“Atu prevene moras dengue labele iha, fila-fali ba komunidade nia konsiénsia no vontade rasik, kada uma no aeradór sira tenke limpeza nafatin atu susuk labele moris ba liuliu bidón, vazu ai-funan atu bee labele nalihun, tenke hamoos beibeik nune’e susuk labele tolun no moris ba,” Diretór saúde ne’e ko’alia iha Vila Antiga, kinta ne’e.
Saúde Munisípiu nafatin informa kona-ba prevensaun moras dengue no fó fatin iha kualkér tempu liuhosi programa siska, mobile klínika, postu no sentru saúde inklui pesóal saúde la’o vizita liuhosi saúde família.
Nune’e mós fó nafatin orientasaun ba líder komunitária sira atu pasa informasaun ba komunidade sira atu halo prevensaun.
“Toba iha muskitériu laran tanba susuk agora barak, moras sira-ne’e maske tinan hirak ne’e malária ladún iha maibé ita prevene nafatin moras dengue,” Domingos fó hanoin.
Munisípiu Baucau rejista área ne’ebé risku ba moras dengue hanesan postu admistrativu Vemasse, Baucau Villa iha suki Gariuai, Tirilolo no Bahú, postu administrativu Venilale hanesan suku Fatulia, Uatuhaco, Bahamori no Bercoli.
Jornalista : Natalino Belo
Editór : Evaristo Soares Martins
