DILI, 20 novembru 2021 (TATOLI) – Primeiru-Ministru Taur Matan Ruak, hamutuk ho Sekretáriu Estadu ba Asuntu Kombatente Libertasaun Nasionál, Gil da Costa Monteiro “Oan Soru”, sábadu ne’e inaugura uma eis kombatente libertasaun nasionál tinan 24, Luis Soares Gama ‘Mauk Rubi’ nia uma iha Metinaro, Dili.
Konstrusaun Uma ne’e harii iha suku We-Nunuk, postu administrativu Metinaro, munisípiu Dili ho medida 11X13. Uma ne’e hahú iha loron 13 jullu no finaliza iha 20 outubru 2021. Fundu ba uma ne’e ho montante rihun $40, konsege gasta rihun $32 ba konstrusaun to’o remata no rihun $ 8 hodi selu badaen.
Konstrusaun ba uma ne’e apoia fundu hosi Governu liuhosi Ministériu Asuntu Antigu Kombatente Libertasaun Nasionál.
Uma ba Veteranu ne’e nu’udar ideia hosi Primeiru-Ministru Taur Matan Ruak, atu dignifika veteranu sira-ne’ebé luta durante tinan 24 iha ai-laran ne’ebé hafoin ukun-an tanba laiha kbiit halo uma rasik atu hamahan sira no sira-nia família.
Xefe Governu iha nia mensajen, hateten, Governu ne’ebé nia lidera sei kontinua halo uma ba veteranu sira fazeadamente durante mandatu hodi dignifika veteranu sira-ne’ebé fó ona sira-nia kontribuisaun ba libertasaun nasionál.
Ba tinan 2021 ne’e, Governu tau dolar amerikanu millaun $2 hodi harii uma hamutuk 117 ba veteranu sira ne’ebé luta durante tinan 24 nia laran, no ba tinan oin sei tau tán orsamentu ba veteranu sira seluk ne’ebé seidauk hetan.
Entretantu, Sekretáriu Estadu ba Asuntu Kombatente no Libertasaun Nasionál, Gil da Costa ‘Oan Soru’ hateten, ohin ema hotu bele haree serimónia inagurasaun ba uma veteranu Mauk-Rubi nian. Maibé hakarak hateten hanesan membru governu laiha mehi atu tau osan hodi hadi’a uma ba veteranu sira.
Maibé, Primeiru Ministru Taur Mata Ruak nia apoia konsege realiza konstrusaun uma ba veteranu sira hahú hosi tinan 24.
“Ha’u laiha mehi ida atu tau osan hodi hadi’a uma ba veteranu sira, maibé osan ida mosu iha ha’u-nia ministériu. Ha’u buka tuir hodi hatene, ikus mai ha’u tenke ba defende iha iha Parlamentu Nasionál no justifika iha Plenária,” Oan Soru ko’alia iha serimónia inaugurasaun uma ba veteranu Mauk-Rubi.
Nia afirma, konfiansa ne’ebé simu hosi Primeori Ministru no ohin konsege realiza tán serimónia inaugurasaun ida ba uma veteranu Luis Soares Gama ‘Mauk-Rubi; nian. Oan soru haktuir polítika VIII Governu nian hodi halo uma ba veteranu sira ne’e hatuur iha dekretu governu artigu 3.
Entretantu, veteranu Luis Soares Gama ‘Mauk-Rubi’ deklara, maske governu halo ona uma ba nia ho kondisaun ida di’ak maibé nia la kontente tanba ninia maluk barak mak la goza ukun rasik an ne’e.
“Barak mak mate iha kombate nia laran, hodi fó biban ba nia moris atu goza libertasaun ne’e, sira-nia sakrifísiu mak ita-nia libertasaun,” veteranu tinan 24 ne’e hato’o de’it liafuan badak ne’e.
Hola parte iha inaugurasaun ne’e, Vise Xefe Estadu Maior Jenerál Forsa Armada, Major Jenerál Falur Rate Laek, Reprezentante Konsellu Veteranu Munisípiu Dili no eis kombatente sira seluk.
Jornalista :Tomé Amado
Editór : Evaristo Soares Martins
