DILI, 22 novembru 2021 (TATOLI)—Ministru Administrasaun Estatál (MAE), Miguel Perreira de Carvalho, hateten Governu preparadu hodi realiza eleisaun prezidensiál iha 2022, no hein Prezidente Repúblika, Francisco Guterres Lú OLo, bainhira mak konvida atu fó opiniaun molok dekreta kalendáriu eleisaun.
Notísia Relevante: STAE prevee millaun $9,3 ba eleisaun prezidensiál 2022
“Governu preparadu hodi realiza eleisaun prezidensiál iha marsu 2022 hodi hein bainhira mak Prezidente repúblika konvida atu fó opiniaun molok dekreta kalendáriu eleisaun,” Miguel Perreira de Carvalho hateten ba jornalista sira hafoin ramata sorumutu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, segunda ne’e.
Preparasaun eleisaun prezidensiál 2022 lao di’ak, no daudaun ne’e Sekretaridu Tékniku Administrasaun Eleitorál (STAE) ho Komisaun Nasionál Eleisaun (CNE, siglá portugés) halo hela resensiamentu eleitorál no atualizasaun baze dadus iha territóriu no diáspora ne’ebé sei termina iha 14 janeiru 2022.
STAE orgaun ne’ebé ezekuta eleisaun halo ona preparativu lojístiku hodi garante eleisaun prezidensiál, nune’e sosa ekipamentu, rekrutamentu brigada, no planu atu rekruta ofisiál eleitorál no akizisaun ekipamentu seluk.
Notísia Relevante: Prezidente Repúblika sei dekreta kalendáriu eleisaun prezidensiál iha janeiru 2022
“Planu STAE presiza diskusaun ho CNE iha tempu balun, iha fulan janeiru bele hato’o proposta ida diskusaun depende ba Prezidente Repúblika konvida hodi orgaun soberania informa kona-ba sira-nia preparative. Tuir lei, Prezidente Repúblika rasik mak sei termina kalendáriu eleisaun ne’e rasik,” nia hateten.
Hanesan órgaun tékniku ba eleisaun, STAE preparadu atu realiza eleisaun prezidensiál iha-fulan marsu tinan 2022.
Antes ne’e, Diretór Jerál STAE, Acilino Branco, afirma iha eleisaun mai identifika ona aumenta sentru votasaun hamutuk 1200 no estasaun votu iha 1.500 iha territóriu tomak.
Tuir baze dadus STAE nian, antes ne’e iha territóriu rejista eleitór hamutuk 846.352, maibé ho resensiamentu eleitorál atualizasaun baze dadus to’o fulan julu tinan ne’e, rejista tan eleitór foun 5,124.
Notísia Relevante: CNE-EUA diskute preparasaun eleisaun prezidensiál 2022
Jornalista : Nelson de Sousa
Editór : Cancio Ximenes
