DILI, 23 novembru 2021 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, akompaña ho nia espoza hala’o “check up” saúde iha kuartél Polísia Militár.
Atividade konsulta saúde Tanente Jenerál Lere, hahú iha tuku 8:30 to’o tuku 9:30 dader, iha Kuartél Unidade Polisia Militár, kintal bo’ot-Dili.
Programa konsulta saúde ba lideransa F-FDTL no membru sira nuudar programa anuál ne’ebé hala’o hosi mediku sira hodi kontrola saúde membru sira nian.
“Ha’u mai check up saúde, maibé seidauk hatene rezultadu, tanba sei halo ezaminasaun, hafoin fó sai iha aban. Maibé ha’u nia kondisaun saúde di’ak hela no Ha’u sente hanesan joven nafatin,” Tenente Jenerál Lere Anan Timur, hateten, ba jornalista sira.
Tenente Jenerál Lere Anan Timur, informa, Governu Xina hato’o ona kompromisu atu tulun F-FDTL konstrui óspital military hahú kedan hosi 2020.
“Atu harii óspitál militar ida ne’e planu iha ona, maibé Xina maka atu fó apoia. Tanba ko’alia ona ho Embaixadór Xina, ne’ebé sira prontu atu harii óspitál militár ba ita,” Tanente Jenerál Lere ne’e afirma.
Daudaun, F-FDTL halo ona indetifikasuan rai iha Metinaro atu halo konstrusaun ba ospitál Militár.
Iha biban hanesan, Xefe Médiku Militar-F-FDTL, Tanente Koronél Infantaria, Guido Oliveira, informa, rezultadu sei publika hafoin halo ezaminasaun.
“Ita halo check up Xefe Estadu Maiór F-FDTL no forsa tomak ne’ebé nia rezultadu sei fó sai aban aban,” nia akresenta.
Nia esplika iha konsulta mak identifika militár balun moras kardiovaskular, tuberkuloze no moras sira seluk sei rekmenda ba tratamentu Saúde iha Hospitál Nasionál Guido Valadares (HNGV) no Klínika Klibur Domin Tibár.
Jornalista : Natalino Costa
Editór : Florencio Miranda Ximenes
