BAUCAU, 24 novembru 2021 (TATOLI) – Diretór Servisu Munisipál Saúde Baucau, Domingos Reinaldo da Costa Guterres, fó-sai katak dadaun ne’e pasiente HIV-SIDA hamutuk na’in-15 mak hala’o hela tratamentu rútina iha fasilidade saúde.
“Ita halo tratamentu hela ba ema na’in-15, feto na’in-hitu mane na’in-ualu, maioria idaide joven,” Domingos ko’alia salaun Kanosiana Vila Antiga, kuarta ne’e.
Nia dehan, munisípiu Baucau kada tinan sempre rejista pasiente HIV-SIDA ne’ebé rezultadu hosi kauza relasaun seksuál no tranferénsia raan nune’e tenke halo tratamentu durante fulan-ualu no hemu ai-moruk kompletu.
Hosi kazu ne’ebé rejista iha saúde Baucau, pasiente balun moras komplikadu no lakohi hemu ai-moruk ne’ebé mak simu no ikus mai akuza isin tuun to’o hakotu iis, maibé iha mós pasiente balun iha mudansa tanba kumpre regra hosi pesóal saúde.
Domingos akresenta, iha fasilidade saúde pasiente balun infetadu HIV-SIDA tanba la’ós rezultadu hosi relasaun seksuál maibé kauza hosi moras komplikadu seluk hanesan Tuberkuloze.
Servisu Munisipál Saúde Baucau nafatin hala’o siensibilizasaun kona-ba prevensaun HIV-SIDA liuhosi autoridade lokál no eskola sira iha Baucau.
“Komunidade balun rona ema ne’e hanesan HIV-SIDA hakribi, susar oituan entaun presiza pasa informasaun ba sira,” Domingos hateten.
Tuir dadaus hosi Ministériu Saúde katak, hahú tinan 2003 to’o 2021 kazu HIV-SIDA hamutuk 1.374, Baucau iha na’in-30 ne’ebé dadaun ne’e halao tratamentu.
Estrela realiza semináriu prevensaun moras HIIV-SIDA
Ho númeru kazu ne’e, Organizasaun Naun Governamentál (ONG) Estrela+ Timor-Leste realiza semináriu parte hosi dezamina informasaun bázika HIV-SIDA no importánsia estígma no deskriminasaun iha sosiedade.
Dirijente Programa ba Investimentu Fundu Globál iha Organizasaun Estrela + Timor-Leste, Fernando Mota, hateten, komunidade barak nia prepektiva ba ema sira-ne’ebé infetadu moras HIV-SIDA mak halo relasaun seksuál arbiru no la asesu edukasaun.
Nune’e, estrela + TL hakarak transmite informasaun loloos nune’e komunidade bele iha koñesimentu ne’ebé di’ak, nune’e bele ajuda hamenus no redús moras HIV-SIDA no redús estígma liuliu diskriminasaun.
“Objetivu hosi semináriu ne’e mak fó koñesimentu ba autoridade lokál inklui komunidade atu hatene oinsá halo prevensaun ba moras HIV-SIDA no halakon estígma ne’ebé hamosu deskriminasaun ba ema sira-ne’ebe mak moris ho HIV-SIDA tanba bele prejudika ema-nia dignidade,” nia ko’alia salaun Kanosiana Vila Nova, kuarta ne’e.
Nune’e Estrela + TL nafatin kolabora ho Ministériu Saúde (MS) kontinua sensibiliza hodi fahe informasaun loloos ba komunidade nune’e hatene konsekuénsia ka risku hosi lala’ok HIV-SIDA nune’e hatene estatutu liuhosi teste iha fasilidade saúde.
Diana da Costa nu’udar estudante kontente partisipa semináriu ne’e tanba bele loke hanoin oinsá atu prevene moras HIV-SIDA.
“Liuhosi informasaun sira hanesan ne’e ita bele prevene-aan ba moras ida-ne’e,” Diana hateten.
Jornalista : Natalino Belo
Editór : Evaristo Soares Martins
