DILI, 29 novembru 2021 (TATOLI)– Sekretariu Administrasaun Federasaun Shorinji Kempo Timor-Leste (FSKTL), Adão Pinto, hateten, iha fulan-dezembru 2021, realiza kampionatu nasionál hodi halo selesaun ba fini atleta ne’ebé di’ak hodi prepara ba futuru.
“Ami hetan apoiu orsamentu hosi Sekretariu Estadu Juventude no Desportu (SEJD) hamutuk $21.000, atu hala’o atividade durante loron tolu hahú loron 6 to’o 8 dezembru iha UNPAZ Dili, atleta ne’ebé partisipa na’in-100, kompostu seniór 50 no junior na’in-50,” Sekretáriu Administrasaun FKTL ne’e hateten Agência TATOLI iha Jináziu Dili, segunda ne’e.
Eventu ne’e sei partisipa klube Kempo hosi munisipiu lima hanesan, Lautém, Baucau, Maliana, Dili no Ermera, kada munisipiu sei reprezenta atleta na’in-20
Enkuantu, komisaun mós prepara ona premiu ba manán na’in-sira hanesan tasa no osan.
“Ami prepara ona premiu ba sira ne’ebé mak hetan primeiru lugar too terseiru lugar sei hetan osan no tasa balun, maibé montante ami labele temi lai. Ba iha ne’ebá mak ita haree no tasa balun prepara ona atu fó ba seniór no juniór,” nia dehan.
Kompetisaun ne’e hanesan meiu ida ba FSKTL hodi prepara nia atleta ba future, bainhira iha jogu internasionál ruma, laiha duvida ba atleta sira atu partisipa.
Jornalista : Hortencio Sanchez
Editór : Florencio Miranda Ximenes
