LIQUIÇA, 03 dezembru 2021 (TATOLI)– Sekretaria Estadu Kooperativa (SEKoop), husu komunidade suku Lisadila, postu administrativu Maubara, munisípiu Liquiçá, harii kooperativa produsaun iha iha suku refere.
“Kooperativa ne’e husi ita ho ita no ba ita, dala ruma ami simu pedidu atu harii kooperativa maibé ema hanoin uluk, pedidu orsamentu, atu hakiak animál maibé kooperativa ne’e Governu bele fó apoiu bainhira ita hahú tiha ona, katak iha tiha grupu ona, no atividade kooperativa mós la’o ona,” Xefe Gabinete SEKoop, Arlindo Francisco Marçal, ko’alia asuntu ne’e bainhira akompaña Ministru ba Asuntu Parlamentár no Komunikasaun Sosiál, hala’o diálogu iha suku Lisadila, hafoin inagura sentru informasaun no lansamentu Naroman ba Suku iha Lisadila, sesta ne’e.
Nia fó ezemplu, iha tiha kooperativa ona maibé sede seidauk iha ka fasilidade hanesan kumputadór seidauk iha entaun bele aprezenta proposta ba SEKoop atubele apoia.
Reprezentante SEKoop ne’e, haktuir, munisípiu Liquiça iha grupu kooperativa barak maibé iha suku Lisadila seidauk iha.
“Iha suku Lisadila ne’e ami la hatene iha ona ka seidauk, kuandu seidauk iha karik, ami husu, liuliu xefe suku bele hatama proposta ba SEKoop hodi harii kooperativa produsaun,” nia husu.
Biban ne’e, Ministru ba Asuntu Parlamentár no Komunikasaun Sosiál (MAPKOMS), Francisco Jerónimo akresenta, suku Lisadila iha área produtividade barak, tanba maioria populasaun hala’o vida agrikultór tanba ne’e maka liuhosi grupu kooperativa bele hasa’e liután produsaun no hamoris ekonomia família.
“Imi inísia took grupu kooperativa rua iha área produsaun depois ba ko’alia ho SEKoop atu nune’e fó formasaun depois harii kedas iha suku ne’e, tanba ho kooperativa ne’e iha posibilidade atubele prodús ai-han iha futuru mai,” Ministru Francisco subliña.
Governante ne’e dehan, ko’alia kona-ba kooperativa produsaun, ko’alia mós kona-ba sustentabilidade futuru nasaun nia ai-han.
“Governu iha ona programa ida-ne’ebé maka tenke sosa ai-han lokál, hanesan sosa hare, batar, fore-mungu, koto, no produtu seluk. Ne’e tinan-tinan tenke sosa, iha proposta OJE 2022 ne’ebé daudaun diskute hela iha parlamentu prevee millaun $25 ba subsídiu ai-han, tau tiha osan mak laiha produsaun atu ba sosa iha-ne’ebé, hanesan konta tuir esperiénsia liubá ligadu ho programa cesta bázika ema dehan iha Loes ai-han barak más sosa dala-ida de’it hotu kedas no fahe ba suku ida de’it mós lato’o,” membru ezekutivu ne’e haktuir.
Governante ne’e konsidera kooperativa produsaun importante atubele mobiliza komunidade kuda barak, tanba merkadu atu faan ne’e iha hela, tinan-tinan ai-han ne’e sosa nafatin.
Nune’e mós iha suku Lisadila iha natar no to’os mós barak ne’ebé pertinente tebes harii grupu kooperativa produsaun atu nune’e sustenta ai-han ba rai-laran tanba polítika governu nian katak neineik la hatama ona ai-han mai hosi rai-li’ur.
Suku Lisadila iha aldeia hitu (7), komposta hosi Bautalo, Kaikasa, Darulema, Glai, Lebuae, Manucabi no aldeia Nunulisa, ho totál populasaun 3.800.
Jornalista : Antónia Gusmão
Editór : Evaristo Soares Martins
