DILI, 06 dezembru 2021 (TATOLI)— Vise Prezidente Federasaun Muay Thai Timor-Leste (FMTTL), José Maria da Silva, informa, daudaun iha ona atleta permanente na’in-50, ne’ebé berani sa’e rin hodi tuir kompetisaun iha nivél nasionál.
“Ami nia atleta na’in-50 mak preparadu no prontu ona atu kompete iha nivél nasionál ba modalidade Muay Thai,” Vise Prezidente ne’e, hateten ba Agência TATOLI iha jináziu Dili, segunda ne’e.
FMTTL seidauk forma asosiasaun iha munisípiu hotu, maibé forma ona klube ualu mak rejista ona iha FMTTL ho atleta na’in-50.
Klube hirak ne’e hanesan Albert Asasint, Asalaino, Lafaek MMA, Natura, Liurai, W-time MMA no seluk tan.
“Ami kada tinan iha planu ne’ebé fiksu hodi hala’o atividade, maibé ita falla tia iha 2020 ne’e tanba Covid-19, nune’e, iha 2022 ita iha planu atu halo atividade iha loron nasionál sira hanesan 20 maiu no 28 novembru no seluk tan,” nia dehan.
Nia esplika, fundu ne’ebé mak durante ne’e FMTTL hetan hodi hala’o kompetisaun mai hosi Governu liuhosi SEJD no patrosinadór-sira.
Federasaun ne’e eziste iha Timor-Leste iha 2018 no hetan ona legalidade hosi Diresaun Notariadu Ministériu Justisa ho nia estatutu kompletu hodi hamrik hanesan organizasaun legal.
Jornalista : Hortencio Sanchez
Editór : Florencio Miranda Ximenes
