DILI, 10 dezembru 2021 (TATOLI) – Armada makikit Laulara, sesta (10/12), obrigadu tenke fahe pontu hanesan ho adversáriu Assalam FC iha jogu jornada da-lima, primeira devizasaun, Liga Futeból Timor-Leste (LFTL), iha Estádiu Munisipál Dili.
Hosi rezultadu empate ne’e fó biban ba SLB aumenta pontu ba hitu no Assalam ba haat iha tabela klasifikasaun provizóriu.
Hanesan baibain jogu hahú sai ona kultura ba ekipa rua iha mundu futeból hodi lansa kedan kontra no atake ba malu tuir tékniku no abilidade jogu ida-idak nian liuhosi duir bola hosi ain ba ain.
Notísia Relevante: Manán 4-1, SLB okupa provizóriu pozisaun daruak iha tabela klasifikasaun
Jogu entre ekipa rua ho velosidade ne’ebé makas, liuliu Assalam joga ho esforsu ne’ebé makas hodi buka golu nune’e bele gaña vitória atu haksoit sai hosi zona mean.
Ho esforsu ne’ebé Assalam halo la hela de’it hanesan esforsu tanba iha minutu 6 jogadór Hasan Ramos (7) hetan ona oportunidade di’ak hodi fura kuak rede SLB muda rezultadu ba 1-0.
Assalam haksolok loos ho rezultadu ne’e, maibé SLB la nonook de’it kontinua hala’o jogu ho kalma atu responde golu ne’ebé iha ona, nune’e iha minutu 13 jogadór Nidio Alves (93) responde ona golu ida muda rezultadu ba 1-1.
Hosi golu ne’e, jogu ekipa rua manas liután tanba adeptu sira mós la tuur nonook de’it, maibé hasai lian hosi tribun hodi fó suporta ba ida-idak nia ekipa hodi jogu ho di’ak atu hetan vitória.
Hosi jogu ne’ebé la’o manas halo jogadór Assalam ladun kontrola bola ho di’ak, nune’e iha minutu 35 jogadór Jermeas Baptista (69) lees tan golu ida ba Assalam muda rezultadu ba 2-1.
Assalam la hakfodak hodi kontinua esforsu to’o kosar habokon isin lolon tomak, maibé kosar been hirak ne’e la saugate tanba iha minutu 37, jogadór Hasan responde tan golu ida muda rezultadu empate 2-2. Hosi golu ne’e termina ona jogu primeira parte.
Dolar ba segunda parte jogu kontinua la’o normál no Assalam hala’o jogu ho ambisaun makas no hala’o jogu iha liña klaran moris tebes, nune’e iha minutu 49 jogadór Hasan kompleta nia golu ikus muda rezultadu ba 3-2, Assalam kontente halo jogu defensivu barak hodi hein oras termina nia manán ona.
Ho jogu defensivu barak ne’ebé Assalam halo fó oportunidade ba SLB hodi halo kontra atake makas ba liña Assalam nian, nune’e iha minutu 74, jogador Nidio Alves prodús golu hodi muda rezultadu ba 3-3.
Hosi golu ne’e hakoi kedan Assalam nia mehi save pontu tolu, maibé save de’it pontu ida. Bainhira minutu termina rezultadu mantein 3-3, ekipa rua obrigadu tenke fahe rezultadu hanesan.
Entretantu, ekipa futeból ne’ebé lidera tabela klasifikasaun provizóriu mak Karketu ho pontu 10, Ponta Leste ho pontu sia, SLB ho pontu hitu, Lalenok ho pontu neen, Assalam ho pontu haat, Aitana ho pontu ida no ikus liu DIT ho pontu mamuk.
Jogu ne’e dirije hosi árbitru prinsipál Pedro Carvalho, juiz liña primeiru Emiliano Araújo, liña segundu Paulo da Costa no árbitru rezerva Jorge Sarmento.
Notísia Relevante: Assalam otimista ‘dere’ AD SLB
Jornalista: Hortencio Sanchez
Editór: Florencio Miranda Ximenes
