DILI, 21 dezembru (TATOLI)—Hahú hosi janeiru to’o novembru 2021, Eletricidade de Timor-Leste, Empreza Públika (EDTL, E.P) rekolla reseita millaun $30,8 ba konfre Estadu hosi kliente ne’ebé uza kontadór pre-pagu.
“Tuir ita-nia projesaun ba tinan ida-ne’e, to’o 31 dezembru 2021 ita tenke hatama reseita millaun $33 ba kofre Estadu, tanba ne’e espera bele atinje,” Prezidente Konsellu Administrasaun, Paulo da Silva, hateten, iha Salaun Santo João Paulo, Comoro, tersa ne’e.
Aleinde ne’e, EDTL, E.P hetan mós reseita hosi penalizasaun kliente ne’ebé kontra regra, dada ahi ilegál, hosi dokumentu konkursu no taxa rejistu foun ba ligasaun eletrisidade.
Kona-ba kontadór pre-pagu 5.000 ne’ebé empreza estatál ne’e simu hosi empreza Lidvi iha faze dahuluk iha loron 13 outubru 2021, parte tékniku halo hela instalasaun ba territóriu laran tomak, ne’ebé bainhira tau hamutuk ho antes ne’e, iha kontadór 15.000 mak instaladu ba konsumidór sira.
Notísia relevante: EDTL,E.P simu kontadór pre-pagu faze dahuluk hamutuk 5.000 hosi kompañia
“Iha fulan ida-ne’e, semana ida ka rua tan empreza sira sei hatama tan 50.000, tanba totál kontadór pre-pagu ne’ebé ita presiza sosa hamutuk 120.000,” nia akresenta.
Nune’e, bainhira materiál sira to’o no liu loron boot iha fulan-dezembru ikus, parte tékniku EDTL, E.P sei halo dsitribuisaun ba munisípiu sira hodi halo instalasaun.
Jornalista : Arminda Fonseca
Editora : Julia Chatarina
