BAUCAU, 29 dezembru 2021 (TATOLI) – Servisu Munisipál Agrikultura no Peska Baucau daudaun ne’e menus ai-moruk kanon atu kombate peste Lakataru iha munisipiu refere.
Responsável Servisu Agrikultura Munisípiu Baucau, Leonor de Almeida de Araujo, hateten, ai-moruk kanon seidauk sufisiente atu halo atuasaun ba peste ne’ebé mak daudaun ne’e atake ona komunidade nia batar iha postu administrativu neen iha munisípiu Baucau.
“Tarjetu ai-moruk ba peste Lakataru nian mai Munisípiu Baucau por volta litru 1000 hanesan ne’e mak foin bele,” Leonor hateten iha ninia kna’ar-fatin, Villa Nova, kuarta ne’e.
Maske nune’e Servisu Agrikultura no Peska Baucau nafatin fó hanoin ba to’os na’in sira atu uza maneira tradisionál hanesan kahur nú, kamí no mina atu kari ba to’os hanesan parte prevensaun nune’e hamenus pestisida Lakataru.
Agrikultura no Peska Baucau rasik daudaun ne’e iha stock ai-moruk kanon ba peste Lakataru hamutuk litru 200 ne’ebé tuir planu sei distribui ba estensionista iha postu sira litru-ualu atu prevene to’os ne’ebé indentifikadu ona hetan ameasa hosi peste Lakataru.
“Sei fahe ba kada postu liuhosi estensionista idak-idak tanba sira mak hatene liu saida mak akontese iha baze,” Leonor akresente.
Leonor esplika, peste Lakataru ne’e mosu uluk iha nasaun Áfrika, liuhosi anin to’o iha nasaun Brazil no hadaet too Kalimantan, Indonézia no kontinua afeta liuhosi anin tama mai Timor-Leste iha tinan-2019 no iha tinan 2020 espalla iha territóriu nasionál.
Jornalista : Natalino Belo
Editór : Evaresto Soares Martins
