Komandu PNTL distribui motorizada 50 ba unidade tolu

DILI, 30 dezembru 2021 (TATLI)- Komandu Polísia Nasionál Timor-Leste (PNTL), distribui ona motorizada hamutuk 50 ba Unidade Polísia Fronteira, Unidade Ofisiál Polísia Suku (OPS) no Unidade Polísia Tránzitu.
Hosi totál 50 ne’e ne’e atribui ba motór 15 a Departementu Tránzitu no Seguransa Rodaviária, Unidade Polisia Fronteira (UPF) lima no Ofisiál Polísia Suku (OPS) hamutuk 30.
“Motorizada hirak ne’e hola ho osarsamentu 2021 no motorizada sira ne’e uza ba eskoltu hodi asegura ema VIP, balun seluk sei apoia ba munisípiu sira inklui postu tránzitu ne’ebé mak destaka iha fronteira”, Xefe Departementu Tránzitu Seguransa no Rodaviáriu Nasionál, Superintendente Xefe João Belo, hateten ba jornalista sira iha kuartél Jerál PNTL, kinta ne’e.
Motorizada ne’ebé mak Komandu PNTL distribui ba departementu Tránzitu, UPF no OPS ho marka versa no KLX, atu ajuda ajuda membru sira halo servisu ho di’ak liután.
“Ita labele rezolve buat hotu -hotu iha tempu ida, maibé pelumenus loron ba loron, ita hakat ida ba oin para rezolve difikldade sira ne’ebe maka membru sira enfeta, atu ezerse sira nian funsaun iha tereñu ho di’ak,” João Belo afirma.
Jornalista : Natalino Costa
Editór : Florencio Miranda Ximenes

