DILI, 04 janeiru 2022 (TATOLI)—Xefe Departamentu Saneamentu Munisípiu Dili, Domingos Soriano, hateten iha selebrasaun Natál (25 Dezembru 2021) no tinan foun (01 janieru 2022) ne’e komunidade iha kapitál Dili laiha konsiénsia hodi soe lixu iha lixeira ne’ebé Governu prepara ona iha fatin públiku.
Notísia Relevante: Pesoál saneamentu rekolla lixu tonelada 180 kada loron
“Tempu natál no tinan foun mak ema prodús lixu liu-liu parte postu administrativu Don Aleixo nian, komunidade mak seidauk iha konsiénsia soe lixu iha fatin ne’ebé ita prepara ona, maske ita avizu beibeik ba sira,” Domingos Soriano hateten ba Agência Tatoli, liuhosi telefónika, tersa ne’e.
Maibé, nia dehan, pesoál saneamentu kontinua iha hakarak hamoos lixu tanba Dili ne’e sidade Timor-Leste nian, tanba ema estranjeiru tama mai haree uluk mak kapitál ne’e entaun sira kontinua esforsu hodi hamoos no raut lixu hodi soe ba lixeira Tibar.
Tuir loloos, iha kapitál Dili ne’e lixu la barak tanba pesoál saneamentu barak mak lisensa ba munisípiu entaun labele hamoos lixu ne’ebé komunidade soe iha dalan públiku inklui iha merkadu laran.
“Maibé ohin ami konsege hamoos hotu parte Don Aleixo nian, Tasi-Tolu no fatin públiku sira. Hela mak João Paulo II Comoro nian, uma lisan Tasi-Tolu nian inklui parte postu Cristo Rei mak Becora Terminál no Bedois nian mak seidauk rekolla,” nia dehan.
Bainhira tama ona natál no tinan foun ema hosi munisípiu mai faan sasán barak loos, entaun lixu mós aumenta barak no ida-ne’e mak sai problema boot ba pesoál saneamentu hodi hamoos lixu.
“Ita preokupa tanba tinan-tinan konsumidór sempre aumenta tanba ita hotu hatene katak sidade Dili mak fatin ema konsentra faan no buka osan, nune’e produsaun lixu sempre barak,” nia dehan.
Kamioneta ne’ebé tula lixu iha Dili laran hamutuk 55 hosi kompaña Lore Solison, Kompaña Labilay, Abolala Zakrilo no Pelipra Bihan.
Governu orienta kompañia rekolla lixu
Xefe Departamentu Saneamentu Munisípiu Dili ne’e hateten, Governu liuhosi Departamentu Saneamentu Munisípiu Dili orienta ona kompañia sira hodi rekolla no redús lixu iha sidade laran, tanba sira mak simu knar no hetan kontratu no munisípiu Dili tau fiar ba sira.
Tuir nia, lixu ne’ebé nakonu iha sidade laran, tanba relasiona ho selebrasaun Natal ho Tinan foun 2022 ne’ebé ema hotu selebra.
“Ita–nia komunidade sira kestiona katak durante Natál no tinan foun ne’e nakonu ho lixu, tanba kada tinan tama iha loron boot ne’e bele akontese. Ita bele kontrata karreta barak maibé depende ba pesoál ne’ebé servisu. Ita hotu pasa ferias ba natál no tinan foun satán ba membru ekipa saneamentu ne’ebé raut lixu, loro–loron sira servisu haluha tiha feen no oan, entaun iha loron boot ne’e sira tenke ba haksolok ho sira–nia família tanba ne’e lixu la foti. Maibé iha loron 24 to’o agora, ha’u monitoriza hela ba lixu hanesan iha área Cristo Rei foin atua iha horisehik no iha beco balun mak agora sei iha lixu maibé ami buka meiu oinsá atu bele redús lixu ne’e,” nia informa.
Iha área postu administrativu Don Aleixu, parte Don Bosco Comoro mak agora kuaze hosi loron boot Natál to’o agora ne’e, lixu iha fatin lima (5) mak kompañia seidauk rekolla, maibé ekipa hahú esforsu hodi redús lixu hosi terminál Tasi-Tolu hafoin bele rekolla lixu iha Kampung Baru parte Don Bosco nian.
Antes ne’e, Governu liuhosi Autoridade Munisípiu Dili kontinua kontrata kompañia lima ho kamioneta 49 hodi rekolla no transporta lixu hosi Dili ba fakar iha lixeira Tibar–Liquiça.
Notísia Relevante: Fevereiru, SMD entrega kamioneta 49 ba kompañia lima atu rekolla lixu
Jornalista : Osória Marques/Nelia Fernandes
Editór : Cancio Ximenes
