DILI, 15 janeiru 2022 (TATOLI)–Laureadu Prémiu Nobel da Paz no Eis Prezidente Repúblika, José Manuel Ramos Horta, hateten nia parte sei presiza tempu atu halo reflesaun molok kandidata an ba Prezidente Repúblika hodi kompete iha eleisaun prezidensiál 2022.
Notísia Relevante: Eleisaun ba Prezidente Repúblika sei akontese iha 19 marsu 2022
“Primeiru ha’u sei halo reflesaun iha oras 48 nia laran hahú ohin to’o aban, tanba segunda feira ha’u sei ba Baucau atu ko’alia ba estudante no akadémiku sira iha ne’ebá. Depois sei ba tuir eventu boot ida iha Baguia,” José Manuel Ramos Horta hateten ba jornalista sira hafoin loke konferénsia MOQURA-X iha Salaun Don Bosco, Comoro, Dili, sábadu ne’e.
Laureadu Nobel da Paz ne’e hateten, ninia viajen iha munisípiu Baucau ne’e laloos atu ba deklara ninia kandidatura, maibé tanba uluk nia apoiu makas kuda ai-oan iha ne’ebá inklui halo negosiasaun makaas ho Uniaun Eropeia hodi apoiu programa balun iha Baguia, entaun nia nia deside hakarak vizita fatin sira-ne’e.
Tuir Horta katak se nia atu deklara kandidata an karik, sei deklara iha Dili, nune’e ema hosi Munisípiu mós bele akompaña tanba Dili nu’udar kapitál ne’ebé halibur ema hotu tanba se iha posibilidade nia sei kandidata an duni.
Enkuantu Sekretáriu Jerál Interinu Partidu Conselho Nasionál Rekonstrusaun Timorense (CNRT), Jacinto Rigoberto, deklara katak tempu badak CNRT sei realiza konferénsia hodi deside ninia kandidatura.
Kona-ba figura Ramos Horta, Jacinto Rigoberto hatán, desizaun sei foti liuhosi órgaun mais altu partidu CNRT nian liuhosi konferénsia mak sei deside kandidatu ne’ebé CNRT ho Xanana Gusmão sei apoia.
Jornalista : Tomé Amado
Editór : Cancio Ximenes
