DILI, 19 janeiru 2022 (TATOLI)—Komisaun Nasionál Eleisaun (CNE, sigla portugés) durante ne’e halo preparasaun eleitorál lubuk ida iha nível nasionál no munisípiu hodi simu Eleisaun Prezidensiál iha marsu 2022, hahú rekrutamentu ba ofisiál supervizaun eleitorál, realiza edukasaun sívika no seluk tan.
“Ita loke rekrutamentu ba vaga ofisiál supervizaun eleitorál na’in-110 hodi destaka ba sentru votasaun 92 iha munisípiu Viqueque. Iha mós funsionáriu CNE permanente hamutuk na’in-hitu mak tama atividade eleitorál, nune’e totál hamutuk na’in-117,” Diretór CNE Viqueque, Honório da Cruz, ba Agência TATOLI via telefónika, kuarta ne’e.
Rekrutamentu ofisiál supervizaun eleitorál tama ona iha faze finál tanba rezultadu prova orál finaliza iha loron 5 to’o 7 janeiru 2022, ne’ebé rezultadu kandidatu taka sai ona no hein kandidatu asina kontratu hotu sei hahú serbisu iha inísiu fulan-fevereiru.
“Molok ofisiál supervizaun eleitorál na’in-110 hala’o serbisu, CNE Viqueque no nasionál sei fó formasaun,” nia akresenta.
Aleinde ne’e, CNE realiza edukasaun sívika hamutuk dala-hitu ba estudante Eskola Sekundáriu no komunidade iha postu Uatucarbau, Viqueque villa, Lacluta, Uatulari no Ossu, ne’ebé ninia alvu hetan partisipasaun ema na’in-100, maibé bainhira realiza partisipante hamutuk 100-resin.
Prezidente Repúlika (PR), Francisco Guterres ‘Lú Olo’ dekreta ona kalendáriu eleisaun, ne’ebé Eleisaun Prezidensiál realiza iha loron 19 marsu 2022.
Notísia relevante: PR dekreta kalendáriu eleisaun, kandidatu bele aprezenta kandidatura ba TR
“Ita-nia preparasaun durante ne’e CNE halo atividade edukusaun sívika iha outubru to’o dezembru 2021. Ha’u relata ba públiku katak CNE Viqueque preparadu hodi hasoru Eleisaun Prezidensiál,” Diretór CNE Viqueque dehan.
Prepasaun seluk mak orgaun eleitorál ne’e halo retiru ne’ebé partisipa hosi munisípiu sira.
Kona-ba preparasaun lojístika ba Eleisaun Prezidensiál, CNE Viqueque hatama ona planu destakamentu transporte no serbisu administrasaun.
CNE halo mós kolaborasaun ho administrasaun munisípiu Viqueque, orgaun STAE no parte seguransa hanesan Polísia Nasionál Timor-Leste (PNTL).
“Daudaun ita iha ámbitu COVID-19 nia laran, nune’e ita koordena ho parte saúde munisípiu Viqueque hodi haree ninia mekanizmu bele uza hodi fasilita populasaun eleitór sira atu partisipa másimu iha eleisaun,” nia relara.
Kolaborasaun entre orgaun eleitorál iha Viqueque konsege identifika eleitór ne’ebé laiha ona (mate) hosi sistema resensiamentu eleitorál ba baze dadus, nune’e iha munusípiu Viqueque númeru eleitór ne’ebé mate hamutuk na’in-1.600.
Iha fatin seluk, Diretór STAE, Humberto Fernandes, hateten, daudaun ne’e prepara ona rekursu tanba antes ne’e halo ona rekrutamentu ba Brigada hamutuk na’in-92.
“Falta de’it formasaun ba brigada sira no matéria lojístika ba eleisaun nian de’it maka ami sei hein, maibé kona-ba preparasaun seluk ami preparadu,” nia hato’o.
Jornalista : Vitorino Lopes da Costa
Editora : Julia Chatarina
