DILI, 26 janeiru 2022 (TATOLI)— Diretór Servisu Autónomu Medikamentu no Ekipamnetu Saúde (SAMES), Santana Martins, informa, laiha estoke aimoruk kímiku fomigasaun no abate, nune’e halo deliberasaun ba empreza atu trasporta lalais aimoruk regra susuk hodi halo prevensaun ba moras dengue iha Timor-Leste.
“Aimoruk abate no malation inklui dengue teste kits oras ne’e ita esforsu tuir deliberasaun no tempu tanba kompañia promete ba ita atu to’o ita-nia rain iha loron 28 to’o 31 janeiru ne’e,” Diretór SAMES hatete ba Agência TATOLI, iha nia knaar fatin-Kampu Alór, kinta ne’e.
Notísia relevante: GPMTL husu Ministériu Saúde aumenta fasilidade atende dengue
Nune’e, Diretór ne’e dehan transportasaun ekipamentu no medikamentu ne’e liuhosi tasi, nune’e iha espera atu laiha fallansu ruma, hodi too lalais iha Dili, hodi fó solusaun ba atendimentu pasiente sira no halo prevensaun ba dengue.
Ministériu Saúde liuhosi SAMES halo kontratatu ho kompañia Australianu atu sosa aimoruk fomigasaun no abate ho orsamentu $51.000.
Hosi kontratu ne’e, empreza sosa ona produtu ka aimoruk abate ho kuatidade saku hamutuk 75, ne’ebé kada saku iha kilograma 25, aimoruk fomigasaun ho forma líkidu litru 1.400, ne’ebé kada bidón iha litru 200.
Dengue hamate labarik na’in-18
Tuir dadus hosi Diresaun Nasionál Saúde Públika lihosi Departamentu Vizilánsia Epidemolojia iha Ministériu Saúde, kuarta ne’e, rejista pasiente dengue iha meadu fulan ne’e hamutuk 972, hosi númeru ne’e labarik na’in-18 mak mate.
“Situasaun kazu dengue iha Timor-Leste, ohin loron 26 janeiru 2022, kazu dengue hamutuk 972 no kumulativu óbitu na’in-18,” refere nota.
Maioria kazu ne’e deteta hosi Munisípiu Dili ho totál 648, Baucau 47, Manatuto 67, Covalima 31, Ermera 71, Manufahi 46, Viqueque neen, Ainaro ualu, Liquiça 13, Aileu ualu no Bobonaro 23.
Nune’e, kazu óbito iha fulan-janeiru 2022 iha munisípiu Dili na’in-11, Ermera na’in-haat, na’in ida hosi Ainaro, na’in ida hosi Bobonaro no na’in rua hosi Covalima, nune’e totál Case Fatality Rate nivel nasional ho 1,9%.
To’o ohin loron semana dahaat ne’e, relata Dom Alexo iha kazu 321, Cristo-Rei 128, Vera-Cruz 91 no Nain-Feto iha kazu 98.
Entertantu, Fasilidade saúde iha munisípiu Dili hanesan Hospitál Nasionál Guido Valadares rejista ona kazu dengue hamutuk 177, klínika Fatumeta 88, sentru saúde Comoro 151, sentru saúde Vera-Cruz 47, sentru saúde formoza 109, sentru saúde Becora 63, sentru saúde Atauro haat,sentru saúde Metinaro lima, Klínika Bairru-Pite rua no Klínika Motael na’in-ida.
MS apela ba populasaun
Ministériu Saude apela ba populasaun iha Dili laran no mós iha munisipiu sira seluk, atu aprezenta-an iha fasilidade públiku saúde (Sentru Saúde ka ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu hosi profisionál saúde sira.
Apela mos ba populasaun iha Dili laran no mós iha munisipiu sira seluk atu no husu mós ba autoridade munisipál no autoridade lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau be semana ida dala ida.
Hamoos sasan ka limpeza hanesan roda aat, bazu aifunan atu susuk labele tau tolun, haloot ropa ho diak iha uma-laran, uza ropa ne’ebé liman naruk karik toba iha tempu loron, uza aimoruk hanesan repelente ka autan, uza muskiteru karik toba iha tempu loron no so’e lixu iha nia fatin.
Notísia relevante:Prevene dengue, OMS apoia ekipamentu no aimoruk rega susuk ba MS
Jornalista : Felicidade Ximenes
Editór : Florencio Miranda Ximenes
