DILI, 31 janeiru 2022 (TATOLI)—Ministra Saúde, Odete Maria Freitas Belo, hateten Governu kontinua esforsu halo asaun prevensaun hodi kombate moras dengue iha Timor-Leste tanba daudaun ne’e númeru kazu sa’e makaas ne’ebé rezulta labarik na’in-20 mate.
Notísia Relevante: Ohin, PN debate urjente ho Ministra Saúde kona-ba moras dengue
“Ita-nia asaun no antisipasaun sira ba situasaun dengue daudaun ne’e kontinua la’o ho esforsu halo prevensaun hodi hala’o fumigasaun atu bele kombate dengue iha Timor-Leste,” Ministra Saúde ne’e hateten iha debate urjente ho Parlamentu Nasionál iha sala plenária, segunda ne’e.
Ministériu Saúde (MS) liuhosi Dirasaun Prestasaun Saúde iha 26 janeiru 2022 fó sai iha Dili kazu dengue aumenta ho nia case fatality rate haktuir katak Dili sai hanesan fatin surtu ba dengue.
Tanba ne’e, Governu halo jestaun ba kazu ne’ebé kontinua aumenta iha semana dahuluk fulan janeiru tinan ne’e no expansaun departamentu emerjénsia ba Hospitál Nasionál Guido Valedares (HNGV) ba iha izolamentu Vera Cruz no Sentru Saúde Formoza hodi halo atendimentu kazu emerjénsia tanba departamentu emerjénsia HNGV la akumula pasiente barak.
Planu kontijénsia seluk ne’ebé Governu prepara mak fatin izolamentu Tasi-Tolu sei sai hanesan departamentu emerjénsia atu atende pasiente dengue bainhira númeru kazu dengue aumenta ba beibeik.
Governante ne’e hateten, asaun prevensaun importante seluk mak halo promosaun saúde kona-ba ema ida-idak oinsá halo ninia prevensaun iha ida-idak nia uma, kampaña informasaun, reativa atividade ekipa task force atu hala’o servisu ativu no promove partisipasaun ativu autoridade lokál no komunidade hanesan halo limpeza jerál iha ida-idak nia bairru.
Notísia Relevante: Prevene dengue, OMS apoia ekipamentu no aimoruk rega susuk ba MS
“Ita sei haforsa promosaun saúde, sensibilizasaun, reforsa kondisaun infraestrutura kontinua hala’o hodi bele kombate dengue,” nia hateten.
Ba área prevensaun nian. Ministériu Saúde (MS) liuhosi Dirasaun Jerál Prestasaun Saúde kontinua hala’o fumugisaun iha área sira-ne’ebé risku rejista kazu dengue sa’e makaas.
Minsitériu Saúde hala’o kooperasaun servisu hamutuk ho Ministériu Administrasaun Estatál (MAE), Ministériu Obra Públika (MOP) hodi hamoos baleta, limpeza iha bairru ho autoridade lokál no komunidade tanba orsamentu ne’ebé presiza hatán ba dengue hamutuk rihun $300-resin.
Iha 2021, nia informa, Ministériu Saúde ho Servisu Autónomu Medikamentu no Ekipamentu Saúde (SAMES) tau orsamentu hodi sosa ekipamentu médiku abate kuaze kilógrama 1875 no malatiun 1400 litru hodi halo fumigasaun, ida-ne’e mak sei iha deliberasaun seida’uk to’o maibé iha tempu hanesan minsitériu uza hela kímiku sira-ne’ebé ninia estoke hosi 2020 nian.
Minsitériu Saúde propoin servisu hamutuk ho Organizasaun Mundiál Saúde (OMS) no ajénsia sira hodi fó apoia Ministériu Saúde iha 2021 atu sosa abate 624 kilograma ho malatiun litru 200, no iha 2022 ne’e iha hela prosesu kompras nian laran.
Jornalista : Nelson de Sousa
Editór : Cancio Ximenes
