iklan

NASIONÁL, DILI, HEADLINE, POLÍTIKA

Lere laiha intensaun atu kompete ho Lú Olo-Alkatiri iha CCF

Lere laiha intensaun atu kompete ho Lú Olo-Alkatiri iha CCF

Knadidatu PR 2022-2027, Tenente Jenerál Reformadu, Lere Anan Timur. Imajen Tatoli/Francisco Sony

DILI, 03 fevereiru 2022 (TATOLI) – Tenente Jenerál Reformadu Lere Anan Timur, laiha intensaun atu kompete ho Prezidente Partidu Frente Revolucionária de Timor-Leste Independente (FRETILIN), Francisco Guterres ‘Lú Olo’ no Sekretáriu Jerál, Mari Alkatiri iha Komité Sentrál FRETILIN (CCF, sigla portugés).

“Ha’u nunka mehi atu ba Komité Sentrál FRETILIN, atu hadau kartaun hodi kompete ho ha’u-nia kamarada sira seluk ne’ebé atualmente iha CCF, liuliu ha’u-nia maun Lú Olo,” Veteranu ne’e informa liuhosi konferénsia imprensa ne’ebé realiza iha nia rezidénsia, Praia dos Coqueiros, Dili, kinta ne’e.

Lere rejeita informasaun ne’ebé espalla katak, atu husu kartaun militante FRETILIN, maibé odamatan taka ba ekipa susesu no konsidera informasaun hirak-ne’e laloos.

“Ha’u-nia maun Mari nunka bele taka odamatan ba ha’u, nia hetete dehan hanesan ha’u orgullu tebes bainhira ita dehan hatais hela farda mós deklara katak ha’u (FRETILIN), ne’ebé nia labele taka dalan. Informasaun sira-ne’e atu sokar lia atu ita ho ita buka problema, ha’u hadomi ha’u-nia maun sira-ne’e hotu,” veteranu ne’e informa.

Lere rekoñese Mari Alkatiri nu’udar fundadór Partidu FRETILIN, ne’e duni laiha dúvida hodi minimiza ba nia kapasidade nu’udar bom jestór atu lidera partidu ne’e, ho nune’e nia prezensa laiha intensaun atu ba hadau kartaun partidu hodi hetan simpatia hosi militante FRETILIN apoia nia iha eleisaun tuir mai.

Jenerál reformadu ne’e deside lakohi ba prodús kartaun militante tanba antes ne’e sai nu’udar segunda jerasaun militante FRETILIN dezde loron 03 fulan marsu 1981.

“Ha’u la FRETILIN ona bainhira ha’u mate, enkuantu ha’u-nia raan sei halai, ha’u nafatin FRETILIN,” Lere hateten.

Tanba ne’e, forsa polítika ne’ebé apoia Lere kompete iha eleisaun prezidensiál mai hosi militante partidu Frente Revolucionária de Timor-Leste Independente (FRETILIN), Congresso Nacional de Reconstrução de Timorense (CNRT), Partidu Demokrátiku (PD), Kmanek Haburas Unidade Nasional Timor Oan (KHUNTO), Partidu Libertasaun Popular (PLP) no partidu Os Verde de Timor.

Jornalista         : Sérgio da Cruz

Editór               : Evaristo Soares Martins

iklan
iklan

Leave a Reply

iklan
error: Content is protected !!